去旅行，除了回憶外，你究竟想得到甚麼？買嘢，會過時；食嘢，只是短暫幸福，我個人好怕失去的感覺；學嘢，還是上堂最好，學成又好學不成又好，最少跟當地文化同艷遇都深層地切磋過。鍾意嘅我回家試呀試，努力將味覺重組，仲可以在朋友前炫耀！Jacky，我已經安排好旅程結束後在家都擺場「囍宴」，我以我名譽做注，一切靠你喇。
記者、攝影：陳慧敏
鳴謝：東瀛遊
絕無相思之苦
同JackyYu一齊在沙巴逛街市，可去高級私人別墅借個靚廚房，成棚團友切磋廚藝學用道地材料整嘢。鍾意食怡保沙嗲、馬來西亞咖喱的Jacky說：「沙巴多廣東人，口味又無新加坡同泰國咁重，啱晒香港人口味！」最緊要是兩地隔得近，回港後材料配料都找得到，你學識後真係煮得番，唔係齋talk。「有時整雞翼，加點香茅，再用豉油呀、薑葱咁已經香口好多。沾點有醋的sauce就最正；或者在菜式中滴幾滴青檸汁，樓下石水渠街成條街都係賣泰國食品，巴蕉葉呀、香葉呀、金不換、青檸、八角、丁香之類在香港都好易買到。」OK，確定無相思無盡期的後顧之憂。
平價Villa
我們去學煮菜的別墅，其實只得4年樓齡，老細鍾意建築，於是自己畫圖，請人起了這家混合沙巴跟歐洲風格的別墅。但5個家人住咗兩年又嫌悶，搬了出去，剩下的大樓就改成Villa給旅客入住，還繼續加建，以滿足老細創作慾。因為唔志在賺錢，最小的獨立客房租金不過$580起，超抵！
Lembahimpian
地址：Km4,Kg.Kandazon,JalanPutatan-Ramayah,89500Penampang
網頁： http://www.lembahimpian.com.my/
「殺你阿媽擺雞」
在沙巴，隨便找個海灣、碼頭，大大粒的海膽都會鋪在石邊，黃黑相間的魚仔游在船邊，不用浮潛都會看到，我興奮影呀影，當地人則狂催我上船。此行我哋去亞庇市中心的菜市場逛逛，它曾是初期的唐人街，許多華人商戶集結，樓高兩層的市場有中國、印尼、印度等香料食物，馬拉香料、配料，沙灘蓆般大束的巴蕉葉只1馬幣成交。近日市場在重修，魚販搬到路上一排臨時搭建棚裏開檔，官方話今年3至5月會重修完畢，但望過去，依然爛茸茸一片，10點喇，鏟泥機都未開工，連導遊Teddy都話：「馬拉時間吖嘛！等等啦！」沙巴這裏的人工作滋油淡定，我知道，是香港人太心急啫。
在這個跳蚤魚市場內，鯊魚、魔鬼魚堆在一起，虎蝦有手臂般長、皮膚黑黑的大漢們，用銳利眼神睥住我們影相混吉，望得我們周身不自在。明眸皓齒的黑小哥拿着榴槤咁大周身刺的雞泡魚說：「殺你阿媽擺雞！」原來他是說早晨（SelamatPagi）。不過，行了這麼久，為甚麼沒見過一個魚缸一條活魚，連虎蝦都是給冰塊掩埋的？
早餐龍躉撈米粉
晚上我們到沙巴最大海鮮餐廳連鎖店《不夜天》去吃飯，遇着老細林文燦──世界中餐名廚交流協會中國部會長，說起過去他停不了口：「南中國海的海鮮，很多來自這裏。」他說20年前，這裏沒有大餐廳，「當時交通未發達，我哋又唔識邊啲係貴價魚，捉到魚就整死佢運去賣！好似蘇眉、龍躉、老虎蝦咁，早餐時我哋會用來煮米粉食！」蘇眉米粉、大牌檔鮑魚，路過的港人雙眼放光，大手買入他們的平價早餐，後來他們才知自己身置金礦，開始懂賺錢門路。至於煮魚，不同客人要用不同方法，香港人鍾意用辣椒或清蒸，但外國人就多要煎同炸。「澳洲人捉到條靚魚會攞去grill，加薯條幾支啤酒就叫好正！哎呀，我冇眼睇呀！」
不夜天海鮮樓PortviewSeafood
地址：Lot18,GroundFloor,AnjungSamudera（TheWaterfront）
出門提一提
簽證：BNO及特區護照均免簽證。查詢：28210800（馬來西亞領事館）
套票：JackyYu品味煮意系列沙巴五天，在歐陸別墅外齊齊整幾味，去唐人街、食海鮮餐同去民族村。每位$6,988起。查詢：36920888（東瀛遊）
貨幣：1馬幣約兌2.15港元
電壓：230V，三扁腳插座
旅遊查詢： http://www.sabahtourism.com
下周馬來西亞沙巴天晴，24-32℃
