行會新貴早前利益申報資料顯示，鄉議局主席發叔一枝獨秀，生意遍佈各行各業，物業無數，仲有成200幅地皮，新界王之名當之無愧。如果唔係要按規矩申報，八方相信發叔都未必數得清自己有幾多身家。
雖則身家多到數唔清，不過發叔噚日開完鄉議局會議後話，佢唔係真正大地主，因為好多地皮只係爛地一塊，嚴格嚟講只係朱義盛，完全唔值錢，有價值嘅地皮，好似屯門醫院現址幅地，早被政府買咗，家陣持有嘅係賣剩蔗。
鄉議局搞萬人盆菜
中國人觀念有土斯有財，今日爛地，聽日可能變黃金，發叔太謙虛嘞。咁大地主日後使唔使頻頻避席唔參與行會呢？發叔強調如果行會議題涉及佢名下土地，會事先申報，由主持人決定佢可否留低，佢唔會次次主動避席，否則煲呔委任佢亦冇意思。雖然發叔入行會爭議不絕，但鄉議局唔避忌大事慶祝，3月28日喺元朗大球場舉行萬人盆菜宴，筵開至少1,300至1,400席，估計有15,000人參加，好墟冚。