軟硬淑女加辣

又係GT-R？錯晒！睇埋側面，真身曝光，係Fairlady至真。裝上日本設計加自家元素嘅包圍，氣質斯文嘅舊版Fairlady即時扮足勁辣師弟GT-R。所以話，凡事都要睇真先好下判斷，就好似呢日以辣妹形象出現嘅吳亭欣（Lulu），自言心儀型仔辣跑，仲不時車手上身，不過原來係馬路鬼見愁。當然，扮GT-R嘅Fairlady就唔會得個樣，一樣辣得起。

記者：黎頌詩
攝影：陳陶鈞

剛拿了08MSCMotorsportsChallenge年度總冠軍嘅改裝專家Wing指，用外國設計、再加上自己嘅變化，係近期改裝車嘅流行玩法。

潮玩變種辣車

見到十足「A貨版GT-R」嘅淑女Fairlady，Lulu即時好雀躍，「我以前都有玩改裝車……」查實，係俾人玩！「我喺美國係讀工程㗎，身邊同學都係男仔，佢哋硬要拎我部車去改，咪改囉！」改成點？Lulu竟然係無乜意見，辣妹Look嘅佢呢點絕對平易近人。講番轉頭，呢兩部扮嘢Fairlady，就一定唔會平易近人！一臉GT-R惡樣，但原來呢套包圍已經喺三年前就出現，比GT-R仲要早面世，不過搞到咁似GT-R，原來係經過後期加工。兩部同時登場嘅Fairlady，一部軟篷、一部硬頂，同時換上相同包圍，但係各自有不同變化，負責設計嘅Wing指：「用外國嚟嘅包圍，再加自己嘅心思做出不同配搭，係𠵱家至潮玩法。」的確，雖然驟眼睇兩者巴辣格一致，但不同嘅顏色組合又可以做出自家特色，即係話，又多啲嘢可以玩！

■吳亭欣話心儀座駕要好似Fairlady咁細細部但Powerful。

無狠劈照噴血

戰車玩改裝，加辣係重點，所以除車頭賣相完全變調外，車尾一樣夠「嚇鬼」，例牌動作加尾翼、擾流，不過最搶都係嗰對口徑加大咗嘅雙出尾喉，夠晒力量感！車仔細細但就搭載3.5公升V6引擎嘅雙座位FairladyZ33，本來就係以辣見稱，啱晒Lulu「細細部，但要Powerful！」嘅DreamCar要求，諗住叫佢掟番轉，點知……「喺香港唔係好敢揸。」原來新車落地無耐，佢已經搞到座駕傷痕纍纍。自稱男仔頭嘅佢揸車其實都好「辣」，當年佢嘅教車師傅就已經嚇餐飽，「佢話我揸車似打遊戲機，係咁衝，不過完全唔睇路。」所以，為咗各位道路使用者嘅安全，今日，大家只係會睇到Lulu喺勁辣變種FairladyZ33司機位擺個噴血Pose，而唔係狠劈……

同一款包圍可以有唔同變化，開篷版（左）噴幼細白色外框，而硬頂版嘅原色部份較幼細。