荷李活男星湯告魯斯（TomCruise）昨日去到佛羅里達州為NASCARDaytona500大賽車擔任嘉賓，同場遇着其前妻妮歌潔曼（NicoleKidman）的現任歌手老公KeithUrban。消息指這對老襟有寒暄及握手，但就拒絕合照，大概是避免給傳媒大造文章。
現年46歲的湯告魯斯與妮歌潔曼雖然已於2001年離婚，但傳媒依然經常將二人的名字扯在一起。昨日靚佬湯到佛羅里達州為NASCARDaytona500大賽車擔任嘉賓，竟與妮歌現任老公KeithUrban同場相遇，為避免尷尬場面，靚佬湯堅拒與Keith合照，只肯對同行的養子Connor又攬又錫扮慈父。幸好妮歌與靚佬湯現任老婆姬蒂荷姆絲（KatieHolmes）均沒有在場，否則場面更加異相。
彼此寒暄握手
當年靚佬湯拍《雷霆壯志》（DaysofThunder）時不但與妮歌撻着，更建立了賽車好手的形象，因此每年NASCAR都會邀請他出席Daytona500大賽車，今年他更以嘉賓身份落場露兩手。但未知大會是否有心玩嘢，今年竟找來靚佬湯的老襟Keith在比賽前演唱贈興。
現場消息指靚佬湯與Keith均避免在傳媒面前碰面，但就有齊齊出席賽前與車手見面的活動。據悉二人見面時氣氛友好，甚有風度地寒暄及握手，但為免尷尬拒絕合照。
齊晒親民作風
事實上靚佬湯與Keith在場內各領風騷，靚佬湯入場時受到熱烈歡迎，不停跟fans握手。到落場賽車時，又一展專業級風範，他更帶同養子Connor及外父MartinJosephHolmes同行，一副父慈子孝好好先生的模樣。至於狂野的Keith則在開賽前以一支電結他rock爆全場，令到台下女士神魂顛倒，唱畢後Keith更與台下觀眾擊掌示好，十分親民。
其實今次靚佬湯去到佛羅里達州，老婆姬蒂及囡囡Suri也有相陪，前日他們一家三口就被拍到遊覽迪士尼世界，其間更大方跟fans合照，Suri還穿上了灰姑娘的cosplay服飾。
