高官唔肯減薪共度時艱，陳方安生係過來人，佢噚日開記者會介紹由佢發起，同社聯、盲人輔導會合作嘅「長者之光」資助白內障手術費計劃，記者問佢高官應否減薪，陳太話公務員都要養妻活兒，唔可以勉強佢哋減薪，又指政府不必博取一時掌聲，與其要人人勒緊褲頭，不如要求政府採取有效措施刺激經濟，創造就業機會。
自己先捐出30萬
好多退休高官熱衷搵真銀，陳太認為退休高官搵工要小心，要考慮公眾利益同市民關注嘅問題，就算自問身家清白，如果返工後被人指指點點，都應該諗清楚是否返新工。至於「長者之光」計劃，陳太都有切身感受，因為十幾年前白內障開刀，手術後一天光晒。
年前佢競選時，知道好多長者冇錢去私院做手術，輪候公立醫院做手術又大排長龍，所以決定發起呢個計劃，自己先捐出30萬元，連同家人、東亞銀行、新地郭炳聯及其他財經界人士，共籌到55萬元，預計可資助60名長者做手術，長者需負擔2,500元費用。計劃查詢電話28762483，捐款可致電25202812。