三三四學制啓動倒數，本地大學紛紛招兵買馬擴充師資陣容，八方聽聞，城大最近聘請數學菲爾茲獎FieldsMedal得主StephenSmale加盟，校長郭位期望有年屆79歲嘅Smale教授助陣，可以吸引更多學術界高人進駐城大。
其實Smale教授並非初嚟甫到，90年曾經喺城大任教，95年離港返美，據熟識佢嘅學者講，Smale當年選擇落戶城大，其中一個原因係佢嗜好收集古式奇石，不時北上搜羅心頭好，城大位於九龍，方便搭火車返大陸好就腳，幾年下來有唔少收穫㖭。
此外，理大校長唐偉章最近亦聘請位WalterYuen做校長顧問，Yuen教授係輻射傳熱學專家，同唐校長好老友，係已故學者田長霖高足。