《街霸IV》入手攻略　喪練9男女

《街霸IV》初喺機舖出現，索價$10鋪，搞到個個打得穩陣又保守，波昇拉打乜都有，咁貴一鋪，我都唔博啦。半年後今日，PS3、XB360家用版雙雙上陣，免費上網任挑兼有練習模式，新系統SA、SC同UC終於發揚光大，角色更由基本16人加至25人（多咗9個新角色），CAPCOM仲講明日後大把嘢Download，呢三百幾蚊，抵畀！

文：殺意隆

聲畫、安裝有驚喜

今次測試版本為PS3，按CAPCOM上次《DevilMayCry4》功力，兩大家用版本分別應該唔大，同樣支援硬碟安裝，據網友報料，XB360有否安裝，Loading時間一樣約5秒，而PS3版相差較大，齋讀碟需13秒，花10分鐘安裝2GBData後，Loading跟XB360一樣約5秒，可算係PS3玩家必做Option。
一入碟，先網上更新Ver1.01，幾MB檔案唔使15秒就搞掂。正式開波，感覺同街機一樣爽快，大部份對白、劇情都可按StartSkip過，最正係每名角色都有專用Openning同Ending，全動畫製作，為玩家緩和番不少緊張氣氛。出招動作主觀地覺得比街機版有更大寬容度，大堆國民連技（跳踢＞下鏟＞出波）都幾得心應手，加上家中接駁擴音機關係，聲音表現比街機更優秀，UC技拳拳到肉嘅重低音、SA破防嘅清脆爆玻璃聲、以及背景狗吠、小朋友嘻哈聲等，均變得相當環迴立體，可以話係史上聲畫享受最佳嘅格鬥Game。
至於Online對戰，XB360跟往常一樣地穩定，而PS3版則相當有驚喜，只要對方連線質素達4格（最高5格），整個對戰過程都唔會出現半點Lag機情況，就算語音交談埋都唔窒，最可惜只容許1VS1開房打，不及《SFIIHDRemix》般，設6人輪戰及觀戰，希望下次更新可改善睇齊吧。

■新加挑戰房間模式，Hard級連技真係超難練。

■25角色全部有卡通OP同ED，格鬥Game中少見。

■家用版對戰唔再逐鋪計錢，大可慢慢練好SavingAttack系統。

新角色
Cammy

必睇！最快攞新人方法

準備就緒，相信好多人同我一樣，唔急住上網挑機，首要目標先集齊25位角色，悶就玩埋連技挑戰模式同TimeAttack等，儲衫兼儲獎盃。想極速儲齊25人，大可將難度調低至Easiest、戰鬥回數校至1Round，記住將ArcadeRequest關掉，免得打街機模式時不斷有人挑機，阻住爆機。實地試過，將全部角色打爆一次，只需兩晚就儲齊隱藏人物，雖然換人爆機都攞到隱藏角色，不過就儲唔齊OP同ED，都係乖乖哋每次用同一人爆機吧。
街霸Fans恨到流口水嘅換裝系統，雖然家用版終於回歸，不過並非靠挑機儲分嚟換，而係像《小小大星球》般，上PSN或Live度買Package，首波「豪腕Pack」已供下載，PSN索價400日圓（約港幣$32），包括E.Honda、蘇聯佬等5名肥佬新裝，連臉部表情都換埋，嚟緊仲有「美女Pack」、「昇龍Pack」等，睇完相片真係幾吸引，不過大家不妨忍一忍，稍後會有集齊全部換裝Pack嘅套餐，售價只係2/3，約一嚿水港紙就買齊。