國家主席胡錦濤出訪中東友好國家，少不免探訪吓當地嘅華人，同啲喺外國捱騾仔嘅同胞打吓氣。早前佢到訪沙特阿拉伯，就專程去當地同胞嘅廠房視察，當中包括中材股份（1893）旗下嘅業務。
話說中材股份旗下間中材國際，承建咗沙特利雅得水泥嘅水泥生產線擴建工程，胡主席上個禮拜三到咗沙特，就去參觀中材嘅生產線項目。據公關大員話，國家主席山長水遠嚟到，集團一班高層都唔敢怠慢，中材股份主席譚仲明即時拉埋董事劉志江，同中材國際總裁王偉，嗱嗱臨由北京總部飛去沙特，同近百位員工齊齊迎接胡主席，譚仲明仲全程傍住胡主席講解公司運作。
據講胡主席對生產水泥嘅技術水平同情況好關心，問得好仔細，仲鼓勵佢哋「要擴大國際市場份額」。考察完，胡主席又親手題詞：「深化務實合作，造福兩國人民」。譚仲明話員工上下都好振奮，仲會「堅定不移地走出去」咁話。