專門提供最新銀團貸款消息嘅財經雜誌《基點》報道，大笨象滙控（005）嘅亞太區槓桿及併購融資部門主管DavidSimons，上個禮拜靜雞雞咁離開工作咗兩年嘅地方。個部門名稱咁長，簡單嚟講其實係專做銀團貸款，至於DavidSimons呢個名大家可能覺得好陌生，不過佢近期做嗰單刁，就應該無人不曉。華華收到風，令萬千股東心碎嘅電盈（008）私有化單刁，安排過渡性貸款嘅策劃人，就係Simons。
負責私有化貸款
Simons喺07年5月加入大笨象旗下環球銀行及市場部，成為亞太區併購融資部主管，之前已經係瑞信猛人，專做亞太區企業融資。據聞，Simons上個禮拜四已經離開大笨象總部。金融海嘯迫使無數金融機構走上絕路，近日大笨象裁員之聲不絕於耳，唔通做完單大刁後，大笨象打完齋唔要和尚？
路邊社消息話，Simons離開嗰時，好似都春風滿面，睇嚟唔似收到大信封，或者可能趁情人節放個長假，返老家澳洲享受陽光與海灘都唔定。
Simons同埋滙豐發言人異口同聲咁話，對事件不予置評。不過噚晚滙控出新聞稿，話委任咗07年入槓桿及併購融資部門做董事總經理嘅JeffBennett，頂替Simons。
講番單刁，原本過渡性貸款，應該同今個月24號高院聆訊同步啓動，但係花樣多多嘅8號仔上個禮拜出通告，話延遲法院會議。照咁推斷，唔知會唔會連筆貸款都延遲埋呢？
李華華
mailto:[email protected]