車迷大概都聽聞過，全新波子保時捷嘅博物館剛喺1月31日正式開幕，設計劃時代，更動用12億港元打造。博物館未開幕已震撼，本報有幸以香港唯一報章採訪，大開眼界之餘亦帶讀者先看為快，絕對新鮮熱辣！
記者、部份攝影：梁美甜
鳴謝：PorscheCentreHK
三V撐起六千噸鋼
全新PorscheMuseum位於Porsche德國Stuttgart車廠對面，博物館外觀設計以「Z」為主調，以反時針螺旋為結構，將內部劃分為展示區、歷史檔案部、經典車維修間、多個活動室做會議電影或音樂會等以及多個餐廳，建築物用上6,000公噸鋼材建成，展示空間只以三個V形結構作為支撐，支撐柱之間遠距達60米，難以想像建築師克服力學考驗係幾咁艱難。埋單成億歐元，等於花費12億港元！劃時代建築設計，更令PorscheMuseum成為Stuttgart地標㖭；配合4月啓用嘅S-Bahn車站，估計未來每年參觀者會達20萬人次，對車廠及當地而言都有極大意義。
螺旋式轉住睇
個人而言，博物館分區可以話既清晰又令人暈浪，矛盾？唔係。展示廳無所謂具體嘅木板劃分區域、標示主題或廳名，但螺旋式導覽線將多個空間展廳盡入眼簾，你可以瞻前顧後，更可以嘆住杯香濃咖啡嘅同時，透過大幅玻璃欣賞到技術人員復修多個經典波子車款，驚喜度爆燈！以往就算係畀錢都未必睇到部經典車款，𠵱家可以嘆住睇人復修，夫復何求？展出嘅車輪更全部行得駛得，以專屬量尺Mark好位展覽！
一切由Type64開始
講起Porsche的歷史，不得不提Type64。其流線車身、雙門跑車格、輪拱線條設計與頭尾燈組等等，經典之處，波子旗下任何款式，都可以從中搵到其影子；由Porsche始創人FerdinandPorsche親身設計同開發，生產於1939，全車用人手以鋁合金打造，設計早見於二次世界大戰之前，但直至今時今日，影響猶在，可見其超然意義。因此，甫踏上長電梯直達博物館展覽入口，即可見Type64「迎賓」，亦由Type64擔起傳承重任，車左右兩邊劃為過去及現代展區，可以選擇順序抑或逆序去認識Porsche。
NewPorscheMuseum
地址：70435Stuttgart-Zuffenhausen,Porscheplatz,Germany
時間：9am-6pm（周二至周日）/周一休息
票價：成人8歐元，小童學生老人半價（一名成人可帶一名14歲以下小童免費入場）
查詢：（49）-711-91124026