周日英足盃第5圈賽事，曼聯客場4:1擊敗打比郡，上半場發生兩代英超猛人埋牙，由24歲「插水王」基斯坦奴朗拿度（C朗）對34歲過氣「殺人王」沙維治；這一幕充滿江湖仇殺味，案發現場卻冇打鬥痕跡，亦冇遺下血迹，反而搵到線狀口水迹，究竟發生咩事呢？
原來，上半場沙維治曾撞跌C朗，呢位「插水王」跪住向球證示意被侵犯，於是「殺人王」上前扯對方手袖示意：「咪詐死，起身！」說時遲那時快，C朗嘴角一翹，吐出一道白色線狀透明液體（口水），好彩「殺人王」後退半步，神態自若咁避過襲擊。
雖然上述埋牙一幕逃過球證同電視鏡頭，但翌日英國報章都大事報道。我求大俠覺得C朗呢次衰到應，大家都知沙維治係淪落英冠嘅過氣大佬，佢當年代表威爾斯對意大利賽前掟馬甸尼波衫落垃圾桶，無非都係博上鏡！今次又有得上頭版，都不知幾開心！
沙維治曼聯出身
而且，沙維治出身曼聯青年軍，但從未獲重用，俾咁嘅「缸瓦」刮花C朗呢隻「瓷器」，你話C朗係咪蠢到加零一呢！事後，沙維治仲賣口乖咁話：「有咁嘅事咩？有就畀張相我睇一眼。我同佢冇牙齒印，乜事都冇發生過！」
今次C朗真要向「殺人王」學嘢喇！作為當紮大佬一定要冷靜，好似佢上半場入波被球證判詐糊，下半場入波後向球證作挑釁手勢，似乎想講：「舉旗呀笨！」難怪費Sir之後嗱嗱臨換佢出場！
本季英足盃強隊林立，C朗能否及時回復狀態，對曼聯爭標好關鍵，好似4強作客史雲斯或富咸後，更強的敵人在後。所以，咪再好勇鬥狠啦，C朗！