美國經濟有幾差，都唔使華華再拋數據嚟闡釋，不過聯儲局主席伯南克間祖屋慘變銀主盤，當中劇情簡直係當今美國人嘅真實寫照。話說伯南克祖父母喺1945年，用750蚊（美金．下同）買咗塊地皮，用4年親手起好間屋；直到96年，伯南克以7.25萬，賣咗間屋畀一對來自德州夫婦之後，就搬咗去北卡羅萊納州嘞。
警衞軍供唔掂破產
對德州夫婦喺06年9月，將間屋轉手賣畀南卡羅萊納州國民警衞軍湯普森，湯普森造咗份12.3萬，30年期定息10.1厘嘅按揭，月供1088蚊。
點知好景不常，湯普森嗰位離咗婚又一齊住嘅前妻俾鞋廠炒咗，佢自己亦俾鞋廠削減工時（湯普森唔使當值嘅時候就會去鞋廠打工），層樓供唔掂，佢同前妻再度分開之餘，間屋喺08年6月俾銀行收咗變成銀主盤，可憐嘅湯普森喺上個月仲申請埋破產，真係人又老錢又冇，前妻又走佬。
兩年跌價33%
喺舊年12月，27歲嘅貸款職員杰克遜用咗8.3萬，即係大約65萬港紙，平近33%買咗伯南克間「銀主祖屋」。杰克遜話，買到伯南克祖屋嗰種感覺離奇荒誕，能夠同當今其中一位最偉大嘅領袖，行埋同一條樓梯感到非常自豪。華華就覺得，伯南克知道後一定笑唔出，因為佢鄉下南卡羅萊納州狄龍縣（Dillon）嘅失業率高達14.2%，比美國整體失業率7.6%高近一倍。
李華華
mailto:[email protected]