科大校長朱經武今年8月將會離任返美國，繼續佢嘅高溫超導研究，希望降低磁力共振技術嘅成本，令貧窮國家嘅病人受惠；另一項研究就由美國軍方資助，研究室溫超導體，希望有助解決能源問題。朱校長噚日上商台開咪，話喺香港八年，最懷念嘅係呢度嘅行山徑，有時行行吓見到啲馬騮仔走嚟走去，好鬼有趣。
面對金融海嘯，科大同商界合作，為學生提供150個實習職位；大學本身亦因應三三四學制，提前請人。不過，呢啲都只係一時嘅措施。臨別秋波，朱校長寄語香港，要搵出金融海嘯之後嘅定位；好似台灣就有妥善嘅政策吸引世界頂尖學者，香港應該投放更多資源做科研，提升競爭力。