車仔球星林柏特場上硬淨過鐵通，其實內心空虛要女伴慰藉。林伯媽媽舊年逝世，周日英國傳媒又踢爆未婚妻艾倫決定分手，仲會帶埋兩個女走！林伯生命中最重要嘅女人都離佢而去，希望佢捱得過呢段日子啦！
英國《世界新聞報》披露，30歲嘅林伯挽救呢段7年情無效後，喺屋企附近買咗間屋畀29歲嘅艾倫，方便第日探望大女Luna（3歲）同細女Isla（1歲）；林伯發言人強調分手不涉及第3者，而經我求大俠查證後發現，分手原因可分遠因同近因。
多次偷食留陰影
遠因就係林伯嘅偷食後遺症。林伯06年12月喺艾倫老家巴塞隆拿偷食斷正，07年7月喺拉斯維加斯再度召妓，導致艾倫怒極取消同年夏天嘅婚禮；舊年5月林伯再被發現同金髮美女接吻，雖然艾倫之後原諒咗林伯，但內心難免有條刺。
近因就係舊年4月，林伯嘅58歲母親Pat肺炎去世後，令佢同艾倫嘅感情迅速惡化。原來林伯一直對母親念念不忘，加上照顧囡囡同專注踢波，令佢根本冇時間陪伴艾倫。好似上月艾倫同兩個女去美國度假，林伯就唔得閒缺席家庭樂，令對方覺得備受冷落。
掛住囡囡積極箍煲
據林伯老友透露：「艾倫同囡囡係林伯嘅寶貝，佢𠵱家極力同艾倫keep住朋友關係先，但就頂唔順囡囡唔喺身邊。」好彩艾倫事後表示唔會離開倫敦。其實，艾倫舊年被揭露同約旦富翁結過婚，林伯嬲完都原諒咗佢，可見佢真係真心鍾意艾倫。
正所謂「近水樓台先得月」。林伯安排艾倫住喺附近，日後只要勤啲上門，密啲幫手通水渠，慢慢濕柴都會燒番着啦！我求大俠希望林伯好快箍煲成功！話晒，「寃家」紅軍隊長謝老四結婚兼有兩個女，林伯又點可以輸蝕呢？