對於《福布斯》話佢身家縮水九成，賭王何鴻燊早排已經冷笑反擊，話旗下賭場好似日日印銀紙；三太陳婉珍亦話唔覺生活有咩影響。不過，三太名下位於石澳山仔四號嘅別墅，就懷疑因為日久失修兼冇人打理，俾村民投訴個泳池生蟲養蚊，搞到要食環署介入，飭令盡快清理。
食環署飭令清理
《南華早報》報道，石澳一名村民投訴，賭王三太名下嘅呢間別墅空置多時，個泳池成為孑孓嘅水上樂園，擔心近日天氣回暖，成為惡蚊嘅溫床，影響環境衞生同居民健康。食環署收到投訴後已經做嘢，早排聯絡咗屋主，飭令對方盡快清理積水。三太亦不敢怠慢，透過發言人話會希望呢個星期搵人搞掂佢。
賭王同三太梗係唔係因為身家縮水而搞到間別墅生蟲啦。賭王喺1958年買入呢間佔地13,000平方呎嘅向海大屋，嗰時屬元配黎婉華名下，大仔何猷光生前亦曾經喺度住，到2006年先由三太買入。三太諗住拆咗間屋，起過間新嘅，但正等緊政府審批，𠵱家惟有一邊等一邊執吓佢，有頭有面俾人投訴就唔好啦。