張露縱橫樂壇幾十年，相識滿天下，不少她的生前好友昨日都出席其追思會，緬懷一番。潘迪華與張露認識了逾半世紀，她說：「張露係我偶像，佢係第一個將英文歌轉唱中文歌嘅歌手，以前要入行做歌手冇咁容易，當時佢真係付出好大努力先會做得咁成功。𠵱家佢早走咗，希望佢喺天堂可以開心。」
憶上警局軼事
靜婷與張露是認識多年的好友，兩人曾經有過不少經歷，靜婷說：「以前我成日同張露去街，有次我哋開車出去，點知架車冇油，當時又未有手提電話，最後我同佢搞到要上差館，諗番起呢啲舊事，我真係好懷念佢。」
劉韻與張露也相交多年，她說：「嗰日老公睇完報紙話畀我聽張露去咗，我係嚇咗一跳，忍唔住喊，我會好懷念佢。佢個人又好客，成日招呼朋友返屋企食飯，張露成日想見到兩個仔成家立室，希望佢個仔可以快啲達成母親心願。」