前嗰排，股壇前輩向敏妮complain，點解睇報紙雜誌上面嘅財務策劃師幫人做財務策劃，好少會討論股票組合，就算敢講，都係好唔貼市，佢哋最叻似乎只係叫人去買基金同保險。同一個問題，敏妮喺一位教財務策劃嘅大學教授口中亦聽過。
獨立於其他機構
敏妮唔敢批評財務策劃師嘅專業，始終孭得起CFP呢個名，並唔容易。不過，好多財務策劃師都係喺保險或者基金公司做嘢，藉幫人策劃財務順便賣吓產品。喺外國，好多財務策劃師都係收費服務，敏妮成日用一個比喻嚟形容，就好似你去睇紫微斗數，畀錢嗰位師傅先會幫你起命盤測運程。
獨立於保險同基金機構嘅財務策劃師，始終會畀人中立啲嘅感覺。不過，中立係咪等於實用係兩回事。嗰位大學教授就畀咗條題目敏妮諗：陳生有兩個仔，兩個讀書都叻，佢諗住嚟緊一年供兩個仔出國留學，但資產唔係好夠，當佢衡量好唔好送對仔出國留學時，究竟邊part資產係最重要嘅考慮？答案有幾個可以選擇，包括佢買嘅壽險夠唔夠、個人嘅投資、未來儲蓄、住緊層樓，同佢份MPF。
一般財務策劃相信第一時間就剔壽險，跟手加埋未來儲蓄，不過兩個仔明年就出國，邊等得，再講，唔通你想買咗份壽險後，冇耐就死，用可觀嘅保險金供個仔讀書！一般冇讀過財務策劃嘅人，可以好冇包袱咁諗，按咗層樓畀銀行就有錢，加埋未來嘅儲蓄情況理想，就可以解決問題。呢個都係教授嘅答案。
理財不單求減債
不過，財務策劃師只會叫個客盡量降低債務負擔、減少利息支出，叫人孭債，似乎犯天條！究道市場上有幾多個財務策劃師會咁實際呢？
溫敏妮
http://wanmanli.com/blogs/