滙豐環球投資管理亞太區行政總裁區邦彥（RudolfApenbrink）調咗嚟香港做嘢唔夠一年，佢之前係滙豐投資管理德國行政總裁，喺德國生活咗好耐，但原來佢一直都好憎食德國菜，咁究竟佢喺德國食乜呢？
喺記者追問下，佢話自己最鍾意食中國菜，印度菜都OK，但就好憎德國菜，皆因德國菜好多fat、好唔健康，所以佢以前喺德國都成日去中菜館食飯，唔怪得佢揸筷子嘅姿勢咁正確，仲好過唔少香港人啦！
太太廣東話了得
雖然區邦彥成日去中菜館食飯，但佢話自己啲廣東話好差，反而佢太太因為成日去街市買餸，同啲小販討價還價，所以廣東話好過佢好多。佢又話香港高級超市賣嘅德國食品好貴，價錢比喺德國貴八成咁多，但因為自己唔鍾意食德國菜，所以冇乜影響喎。