股路縱橫:港建趁低吸短線目標升4成 - 郭兆誠

股路縱橫:港建趁低吸短線目標升4成 - 郭兆誠

內地股市上周氣勢如虹,但港股未有受惠,恒指全周下跌100點,H指亦跌129點。恒指暫時未能擺脫在13000至14000間窄幅上落之局,但A股已走出低谷,一定程度上應可對港股起到帶動作用,恒指短期表現可看高一線。
早幾日提過,中資對A股信心已恢復,並料A股由低位反彈後,短期可以再升一成,事實已係最好證明,A股上周大升,仲係第一個股市成功收復海嘯後失地。中資睇好A股,對港股亦有新部署,開始逐步入市,買入對象大部份係中資股,當越來越多人加入吸納行列,大市就會破位而上,升勢轉急。
金融海嘯衝擊下,各國經濟急劇下滑,企業盈利亦倒退,甚至虧損,但大跌市後,股價已跌到殘晒,所以,當公司一如預期發出盈警後,股價非但唔跌,反而因壞消息已出籠而反覆造番好。香港建設(190)股價在盈警後就恢復強勢,成交大增,呢類跌得過份嘅實力股,一旦反彈,只要回升上較為合理水平,升幅已可好可觀。

手持現金40億

港建07年中歷史高價3.80元,08年10月跌到0.27元,大跌逾9成。去年第3季,港建股價仍企於1.30元水平,豈料短短個多月就大跌8成,實在跌得過份。去年12月跟市反彈,曾高見0.74元,後因盈警而回落到0.42元,現時又回升上0.54元水平整固,10日線(0.48元)本周會升越20日線(0.49元),出現更強入貨訊號,短線可以0.74元為目標,升幅約4成,中線可回升到1.30元的徘徊區水平。
港建主力做內地房地產同環保能源,呢兩瓣業務,都係中央振興經濟政策中的主要目標,未來幾年會大大受惠。港建成功在大旺市時鞏固實力,現時手頭現金有40億元,有利集團在市況低潮時「擇肥而噬」。
港建係基金股,兩大基金股東Cerberus同Penta分別持有17.9%與16.2%股權,年多前「披成」時以2.05元接貨,連同大股東黃氏家族持股38.3%,3個Party已揸咗72.4%,加上其他基金持股,街外流通貨源應在一至兩成之間,只要基金一發力,股價好易飛升。
郭兆誠