band仔向來無「樂」不作，往往更會有意無意散發着一種冧女的魔力。時移世易，美國的格林美都由Rapper當道，香港就有農夫橫掃多個頒獎禮的組合金獎，不少妹妹仔更仿似轉了口味，迷戀在Hip-hop且Funny的Rap之下，究竟這場RockBand與Rapper的角力，誰勝誰負，且看今次Mr.和農夫如何口誅筆伐，以口還口地對決一場！
記者：蒙為亮
攝影：陳陶鈞
化妝：Manyee
髮型：Renton、Ivan@SalonIDE
服裝：Juice、adidas
Mr.
前身是獨立樂隊WhiteNoise，以PopBand自居。07年出道推出同名專輯，由主音Alan、結他手Ronny、結他手MJ、低音結他手Dash及鼓手Tom組成。「Mister」解作「平凡人」，隊員自覺是普通人以平常心做音樂，就以縮寫Mr.作為隊名，08年更奪得叱咤樂壇生力軍銀獎。
農夫
於2000年成立的嘻哈組合，成員包括陸永和C君，風格多以Rap的形式唱出輕鬆幽默歌詞，至今已經推出過五隻唱片，過往曾和不同的歌手及名人合作（如林一峰、方大同、詹瑞文、麥玲玲、陶傑等）。07以及08年連續兩年奪得叱咤樂壇組合金獎。
鬼馬RappervsCool爆Band友
訪問之先，Mr.與農夫先上演一場舌戰，記者單刀直入問了一個重心問題，究竟band仔冧女還是rapper搞鬼𠱁女技勝一籌呢？C君一開口已經飽受Mr.五子以口反擊，恍如一場battle，情形嚴如大家悍衞自己的音樂而戰一樣。
C君：講冧女，一定係聽Mr.啦！好簡單，一支結他已經足夠融化女仔嘅心，band仔有樂器，好似Ronny玩結他個樣咁認真，啲女Fans見到都暈晒浪，加上佢哋唔識玩結他，自然對bandsound有一種神秘嘅好奇，所以梗係Mr.冧女勁！
MJ：有無搞錯呀，全行都知農夫最多女Fans啦！
Ronny：我成日都見到你哋出show時，啲女Fans喺下面尖叫，又舉晒牌咁，真係一時無兩。
陸永：你搞錯喇，佢哋尖叫係因為見到我哋好驚咋，因為我哋rap得太難聽，所以諗住尖叫嚇走我哋！
Alan：無可能！你哋啲詞又夠純又鬼馬，我哋啲band仔唱完歌唔講嘢會俾人話cool，加上又唔識搞笑，因為我哋本身個人都好悶……
C君：咁咪啱囉，我哋都想人哋留意我哋啲歌，同埋其實我哋都好悶㗎，邊個話畀你聽農夫係搞笑㗎？哈哈哈！講真，cool有cool好，大家會focus番你嘅音樂，始終用音樂嚟冧女先係王道。
Dash：我都贊成，不過呢幾年國際band壇都好似無乜代表band。
Alan：係呀，仲記得當年Beyond幾多女Fans，佢哋真係好犀利！有時會諗，如果有一日可以好似Beyond咁就好。
C君：嗱，我都話band仔冧女勁啲啦！band嘅熱潮斷斷續續都會keep住hit，不過對於rap，呢幾年hit得咁快，只係可能大家貪新鮮咋。
Tom：終於認自己冧女喇！
陸永：唔係喎，我喺街度聽啲少女講，全部人都聽Everyone喎！
Dash：定係你嗰隻冧冧Everyone呀！哈哈。
Alan：一句，邊個認為Rapper有口才，搞gag冧女掂嘅，請舉手。
（除咗農夫，全場人一齊舉高隻手，一啲都無怕醜，在人多蝦人少的情況下，咁農夫只好默認！）
無情Band仔vs花心Rapper
一句「Band仔無情」，由細到大都聽得多，但現實生活中卻甚少見，如Beyond的家強又結婚又生仔，外國有格林美得主Coldplay的主音ChrisMartin依然和結婚五年的GwynethPaltrow甜蜜蜜。相反，Rapper就給人一種玩世不恭的感覺，而且有急才、有口才仿似花弗浪子。Mr.和農夫對這兩樣指控式的標籤立刻高呼：「寃枉呀！包大人……」
Alan：我覺得band仔絕對唔係無情，如果對身邊人和事無感情，邊有靈感作歌呢？
Tom：不過呢句咁oldschool嘅對白，有次真係成為咗我同女朋友鬧交嘅主題。
C君：最後有無分手先？
Tom：梗係無啦！好小事啫，女仔發吓脾氣一定會有，之後𠱁番就OK啦。
MJ：我反而覺得啲人話band仔無情係因為我哋因為成日夾band，搞到好少時間陪佢哋，最後講講吓又話我哋開始唔理佢哋囉。我想講我哋唔係唔行街、睇戲、買衫，只不過我哋唔會日日咁做。
陸永：好多怨氣喎，你無事嘛？MJ
MJ：哈哈，講得太投入！都係以前嘅經歷，𠵱家開心好多。（眾人齊齊暗笑！）
Dash：好多外國樂隊都係以情歌做主打，好似Blur、U2，仲有Beyond嘅終極冧女歌《喜歡你》，十幾年後嘅今日都依然咁好聽。其實好多時bandmusic同愛情係不可分割，況且單單愛情兩個字已經可以賦予其他人無限嘅想像空間。陸永你應該好清楚，你平時收收埋埋咁多催情rapsong。
Tom：哈哈，係，我記得有句係「如果只可以見你一天，我希望係以後嘅每一天。如果只准我見你三天，可以係昨日今日明日。」呢啲咪媾女高手囉！
陸永：嘩，講講吓band仔無情，突然間做乜燒埋我度呀？我認我哋喺感情呢方面，係好豐富嘅！
Alan：咁即係花心啦！
陸永：唔係花心，專一就真，只有用真心，啲rap先咁冧。
C君：我哋係花心思啫，我都曾經嘗試寫過一首上海話rap歌畀我當時女友，不過佢係上海人，都唔知我唱乜？
Ronny：你試試星期日去皇后像廣場唱，可能會搵到你女友呢，哈哈。
09年一路rap一路jam
古語有云「道不同不相為謀」，上年出道的Mr.已經不再是生力軍了，面對農夫，其實是在組合大獎的競爭對手，但從另一角度看，作為師兄的農夫又會否與這五位樂壇師弟並肩作戰，09年拍住上，締造一番樂壇新氣象呢？
陸永：新一年我哋將會推出一隻新碟，無論製作定方向上都會同之前好唔同，DJTommy今次應該唔會參與創作部份，反而幫我哋囗嚟外國嘅Artist做監製，不過一切都係計劃階段，所以都有機會加bandmusic元素，到時睇吓有無火花！
Tom：陸永，你好似仲會開talkshow，有主題未呀？
陸永：應該會喺暑假開show，只得我一個solo，而且講明唔會rap同唱歌，先小人後君子，所以到時一定無得回水。主題雖然未度好，但今年廿六歲，所以我想將我過去嘅成長同大家分享。今次唔預C君，因為佢要專心搞音樂，狂作歌，仲會夾band。
C君：係呀，都想寫多啲歌畀其他歌手朋友，而且仲會夾吓band，放多啲時間搞我對「蘇C虎」。
MJ：我都有聽過你哋首Demo，一到副歌好high喎！
C君：𠵱家都係剛起步，到時機成熟，最緊要係手藝都成熟，到時同我哋一齊jam吓歌吖！
Alan：好！一言為定，不過呢幾個月，我哋會閉門造碟，今年想出一隻fullalbum有十首歌，仲想加多啲band以外嘅樂器，初步諗會有小提琴，希望年尾開到個show就最好！
Dash：年中仲有一個拉闊音樂會要做，今年Mr.真係有好多第一次，希望真係可以帶動香港沉睡咗嘅bandsound文化。
陸永：一步一步嚟啦！音樂同識女仔一樣欲速則不達呀。師弟……
後記：
與Mr.和農夫也不是第一次做訪問，懶friend詐儍扮懵問問他們一些八卦緋聞，先問與卓韻芝打得火熱的MJ，「其實你同阿芝發展到咩階段啫？」MJ未開口，身旁四位好兄弟立刻不斷扯開話題護航，「咩阿姿？百力滋呀？」另一邊問陸永與Miki有否進展，C君又幫口說：「當日影到嗰位其實係我呀！大家認錯…」可能是我道行不夠，也慶幸自己不是娛記，否則無功而還真羞家。不過，我卻完全體會到band仔同rapper唔止唱得，媾女得，「救」兄弟同樣身手了得！