立法會主席曾鈺成最近春風滿臉，佢同培僑中學舊同事伍嘉敏嘅戀情成為傳媒焦點。噚日情人節翌日，兩人雙雙現身銅鑼灣時代廣場一間酒樓，席間仲有女方嘅屋企人。見家長咁重要，點知曾鈺成遲到10分鐘要人哋等，飲完茶又提早離場，硬係要前後腳，十足C1娛樂頭條嘅主角咁款。
八方噚日收到讀者報料，話61歲嘅曾鈺成同女友伍嘉敏喺時代廣場嘅聘珍樓嘆茶。星期日飲茶咁溫馨？八方都想分享吓，咪落銅鑼灣行番轉。約莫1點鐘午飯時間，只見伍小姐已經喺度等位，另外仲有一位撐住枴杖嘅老太太由幾位女士陪同到場。冇幾耐，知客安排咗近門口一張大枱畀伍小姐。據八方事後了解，老太應該係伍小姐嘅媽咪，幾位女士係佢嘅妹妹。
女方親夾點心餵到飽
雖然係星期日又係家庭聚會，但伍小姐都着得好斯文，白恤衫襯黑色外套，戴住對幼框眼鏡，喺對住門口嘅一個座位坐低。伍老太就坐左邊，右邊個位留番畀曾鈺成，其餘幾個妹妹就背住門口坐。大概過咗10分鐘，曾鈺成終於嚟到，笑容滿面咁同老人家以及伍家姊妹打招呼，坐低之後大家有講有笑，伍小姐仲多次夾點心畀曾鈺成食，其間大家又一齊舉起個茶杯，唔知慶祝乜嘢咁。
其實又唔怪得曾鈺成遲到，因為佢身為立法會主席，朝早去咗立法會足球隊對駐港總領事場足球友誼賽。但據現場目擊者同八方講，曾鈺成換咗波衫落場唔夠15分鐘，已經靜靜雞去咗換衫，着番件恤衫同淺色西裝外套，原來係去見家長。
快樂嘅時光過得特別快，呢次見家長大約一個半小時就完，曾鈺成冇爭住找數，由女友埋單。正當八方以為佢哋會一齊行出嚟嘅時候，只見曾鈺成同伯母打個招呼，就自己急急腳先行告退。八方諗住恭喜阿主席喜逢第二春兼順便問佢幾時好事近，但曾鈺成唔想多講，轉個頭仲行咗入一間書局。喺呢個時候，伍小姐亦同屋企人離開酒樓。八方聽聞，曾鈺成今次飲茶見家長，只係家庭聚會，唔係談婚論嫁，大家唔使咁快恭喜曾生住。
