自從舊年中信泰富（267）炒燶外滙單嘢曝光之後，董事總經理范鴻齡已經暫停多項公職，包括積金局主席職務。咁啱積金局主席嘅任期下個月16號就屆滿，睇怕范總都應該唔會再坐一會嘞，華華仲收到風，話自從爆出中信泰富炒燶外滙後，政府方面已經開始搵繼任人，不過家陣都未有定案，而坊間近排亦開始「貼」邊個係熱門人選。
要了解積金局運作
曾經有人估話行政會議成員張建東有機會接任，但佢已經否認咗。隨住特首上月委任行政會議5位新成員入局，市場又再有新揣測，其中新貴葉維義同時係積金局強制性公積金計劃諮詢委員會委員，有機會順理成章接任埋主席職務。不過，據了解，主席人選唔一定要係行會成員，反而係要對積金局運作有一定了解更重要。