英超如沒有超級富豪玩老細足球，單睇曼聯表演單騎快放，好多球迷會覺得不是味兒。像上周六深夜，鏡頭不斷捕捉韋健士、軒迪克及阿巴莫域治，娛樂性豐富，早場英足盃直播全和的悶氣一掃而空；也好睇過場內班億萬車仔球星，同個爛場搏鬥。
在曼聯AC打響名堂
車仔出身、但70年代尾起在曼聯及AC米蘭打響名堂的韋健士，是我童年時代睇至愛的《英國足球畫冊》常客。依稀記得他當年仍有大把頭髮，英軍中表現尚算瀟灑但多只踢交差波；計搶鏡，不及白賴仁笠臣同連尼加。
韋健士的領隊生涯載浮載沉，今場難得話事；那管可能是對手級數所限末段氣力不繼，但贏波起碼沒有令全場坐立不安、兼不時被坐在他前面的屈福特球迷騷擾的油王出洋相，自己保住兩次任車仔看守領隊皆贏記錄（上一次是00年）。
只見韋健士全場叫喊，面部繃緊，落後一球後換走與他同類型的約翰米基爾（入球少並常只在中場「駁腳」）；換入較有侵略性的史度治，即連入3球反勝，韋健士再也忍不住振臂高呼。他知道，一臉冷酷、慣在俄國生活的軒迪克上場，自己又要安坐後備席當副手，做好如已離隊的奇勒、負責照顧隊中的英格蘭大哥級球員。
他賽後說：「你們未見到最好的車仔。（Youhaven'tseenthebestyet）」我想他可能在暗示，大家未真正見到他領軍的功力；不過大師級的史高拉利走後，再來個更猛的軒迪克，安份在旁偷師，在這風大雨大的時勢，不用接這燙手山芋，未嘗不是好事。
蘋果波神
（周一）蘋果波神‧（周二）吾中/青蛙仔‧（周三）法比奧‧（周四）藍鑽石‧（周五）牽牛/畢傑‧