乜嘢叫形勢比人強，睇富通同平保（2318）嘅關係大概可以了解。
華華噚日睇道瓊斯通訊社報道，上個禮拜五先正式被委任入富通董事會嘅GeorgesUgeux，唔夠24個鐘就請辭，冇留低任何解釋。
平保提名人選上位
同佢一齊入局嘅仲有JozefdeMey同JanZegeringHadders，除咗deMey係平保提名之外，另外兩位都係由比利時同荷蘭嘅股東提名。3個人中，據講Ugeux最有機會問鼎董事局主席個位。
奇詭嘅係，報道收到風話，家陣Ugeux走人，最有機會坐主席位嘅，會係現年65歲嘅deMey。
正所謂「你敬我一尺，我敬你一丈」，唔知係咪事有湊巧？早前富通喺冇知會平保嘅情況下，修訂拆骨出售旗下資產嘅交易條款，激到平保話明投票反對出售資產，結果順利推翻單刁。
今次你估係有人知難而退，抑或有人背後發功呢呵！