畢傑媽子今個禮拜生日，雖則唔使「籌旗」請佢食飯，一百幾十元喺袋我總有，不過都想小注3串4博大大回報。話明扒冷門，命中機會梗係唔會太高，志在騷料子畀媽子睇睇。
蘇超周日演榜首大戰，些路迪今場話叫有主場之利，但季初都試過主場輸2:4予格拉斯哥流浪，對撼未必有着數。些路迪中場靈魂中村俊輔剛在世足外對澳洲搏到盡，今場演出或多或少有影響。格流贏波即上榜首，點計都有得扒冷，昅實3.15倍客W。
轉過頭串意甲賽事，博場海軍鬥水兵基爾禾迎戰卡坦尼亞，要個3.4倍客W。「升班馬」基爾禾實力點計都唔會好得過卡坦尼亞，話唔埋今場又打回原形，吼卡坦尼亞W之餘，再要埋7倍「和/客」；事關基爾禾今季暫12場主場聯賽，有7場半場與對手賽和。
博紐文西亞馬略卡「6」球
最後揀番最熟的西甲，周日有場榜尾大戰，是6分波的「大」戰！西甲今季3支「升班馬」都不打龜縮戰術；18位的紐文西亞今周對住20位的馬略卡，可謂護級大戰。總入球就玩有18倍的「6」球，波膽則要50倍的3:3。文：畢傑