世間上有很多蕩氣迴腸的愛情故事，往往令人刻骨銘心，但正如劉德華所言，幸福是要爭取的。談情說愛極之容易，但太易得到手的卻又不珍惜，要一個細水長流的長途伴侶實在不易。華仔坦言有些女星令他心動過，不過為怕被人談論，惟有自我警惕，很快便無疾而終。
劉德華一向很少談感情事，滿口也是工作再工作，或者拍戲再拍戲，最近他趁情人節期間，推出一張冧歌碟，冧盡天下有情人，其中一首由林夕填詞的《長途伴侶》，是華仔的極品推介，他對歌詞十分贊同說：「真愛係好難自私嘅，愛冇話應唔應該，凡事有好有唔好。」
問華仔可會將《長途伴侶》這首歌送給他自己的長途伴侶？他笑說：「我會送畀自己聽，有時令我想起好多身邊朋友，我見盡好多朋友離離合合，唱呢隻歌時想起一啲畫面，佢哋曾經開心過又點解要分開呢，當中一定夾雜好多因素，愛真係冇一個標準，希望大家有好結局。」
「唔會孤獨終老」
華仔也想自己有一個好結局，他說：「哈哈！我係一個好人，會有好結局嘅。」他覺得每段愛情有起也有跌，人與人之間的關係非三言兩語能盡錄。華仔說：「有時佢啱，有時我錯，可能鬧完交先知係自己錯，咁我會承擔番自己嘅錯，真愛就係要咁。」在圈中拍盡無數靚女星的華仔，坦言有些令他心動過，不過為怕筆下不留人，惟有自我警惕，很快便無疾而終。
劉德華有個花名叫牛華，他從不介意別人這樣稱呼，因為事實上他如牛般辛勤工作，有人笑他已娶了事業為妻，他卻說：「又唔可以咁講，我一個人生活都OK㗎，不過我相信自己唔會孤獨終老一個人。」華仔一向慎言，在其口中絕少提及多年來傳聞中的女友朱麗倩，問他為了事業犧牲了她，華仔大笑說：「冇呀，冇呢個人喎！」
多年前有雜誌大字標題報道，指朱麗倩拖着一名幾歲大的女孩上街，於是傳出華仔有個女，之後又影到一個小男孩，結果他又多了一個仔，他說：「好多年前影到嗰個係我細佬個女，後來影到都係細佬個仔，佢哋冇所謂，因為佢哋唔會理，又唔使同人解釋，我諗咁多年來久唔久又講吓，話我有女朋友又係佢哋（傳媒），話我同性戀又係佢哋，乜都講過晒，未來日子係可以用時間證明，我會畀大家睇到。」記者忍不住再問一句，幾時先公開她呢？華仔只繼續笑笑笑！
「俾女飛好傷心」
華仔是圈中數一數二的白馬王子，但原來他絕對不是浪漫之人，而且試過俾女飛，經歷甚傷心，他說：「入咗行先被飛，都好傷心㗎，我啲情史一隻手數晒，我唔係絕緣體，只係冇時間，愛一個人要時間，表達都要時間，唔會表達一兩次就OK，要長時間琢磨先有一段美麗真愛，我相信過去我遇上過嘅人，大家都係認真嘅，唔係玩玩吓，只怪timing唔啱囉。」
華仔自言不夠浪漫，他以前追女仔最浪漫是送親手畫的生日卡，送相思豆錦囊。他笑說：「浪漫冇一個界定，可能唔使燭光晚餐都可以浪漫，大家一齊食飯，你將最後一嚿肉夾畀佢食，咁都好浪漫，其實係一種感受。」
向王晶報恩
劉德華去年在百忙中抽空為內地賑災，他覺得做人要懂得回饋社會，回饋朋友，所以他接拍了王晶執導的電影《未來警察》，很多人不明白既然王晶的高峯期已過，為何華仔會願意接拍這部戲？他說：「我知晶哥壓力好大，我當年都係拍晶哥啲戲起家，我唔介意人哋點講。」
華仔續說：「今次嘅老闆蔡松林係我恩人，91年我間公司（天幕）經營失敗，欠佢成千萬，佢係唯一冇追我還錢嘅人，之後佢經濟出現問題，我覺得𠵱家唔報恩，唔知幾時先報到。」
撰文：陳寶明
攝影：葉君海
場地提供：香港君悅酒店
