今個農曆新年檔港產片最強──《葉問》，估唔到玩完元宵花燈無耐，咁快就出碟，而且仲係DVD、Blu-ray雙連發！古仔、場面，再加當打甄子丹，第一時間必撐！不過見係「老環」出品，小心先買隻DVD試玩；聲畫好一般都係預咗，唔知係咪記者咁好彩，咁啱買着隻「花咗」嘅次貨碟，尾段戲肉打鬥竟出現少許窒格，爭啲連屋企張凳都𠝹爛！
記者：許福合
攝影：王文忠
日本侵華 熱血背景
提起詠春同葉問，就有如霍元甲同李小龍一樣，可以話無人不識嘅當代武術宗師；雖然《葉問》故事幾成真？甄子丹鐵拳連打係咪出自詠春套路鬧得塵塵囂囂，記者唔係「功夫熊貓」，亦無意批評；以戲論戲，觀賞娛樂性絕對值得睇！
故事講甄子丹飾葉問，雖一身不凡武藝，不過為人低調，非但無收徒弟，即使被人打到門口，每次都關門先肯出手；後來日本侵華，葉問生活都唔好過，而日軍一名軍閥三浦知道葉問身手後，就強要與葉問一戰，更要話學中國武術，電影主角當然唔會做漢奸，於是就在擂台與三浦展開生死決。
我要打10個
電影打鬥場面幾多！樊少皇飾嘅金山找，北佬式為名逐利周圍踢館，到林家棟演活勢利小人式漢奸，都好起到綠葉作用；但講到拳拳到肉者，梗係甄在日本道場一幕，睇完你就知乜嘢叫「1個打10個」，唯一可惜係煞科戰日本軍閥三浦，池內博之型仔有如，但功架不足，絕對可謂反高潮「成功」。
DVD聲畫表現，只可用不過不失形容，光猛外景無問題，暗黑道場打10個一幕，感覺有啲死黑，而且Noise感覺亦幾重，碟機Setting真係要推光啲就一就，至於聲效方面，感覺有啲浮，令好多時中拳感覺唔多實淨，令到肉感打咗啲折扣。
另外記者買碟時，不幸回家發現DVD竟是已脫盒扣的「刮花碟」，更令畫質有少許窒格情況出現！好彩嚟緊呢兩星期有日版同UK版Blu-ray推出，驚無中文字幕？唓！港產中文片，咁都要？唔好玩啦！
