噚日去個friend喺清水灣嘅村屋坐吓，揸住架車入村，啲村路又窄又泊滿車，點知前面突然間有架車轉過嚟仲撞埋。雙方車頭都有少少凹，我落車想話對方唔小心，對方幾個男人已經落車鬧：「點揸車㗎！」我梗係同佢哋理論啦，但猛虎不及地頭蟲，終和氣收場，雙方各自搞掂自己架車就算。
呢啲真係口同鼻拗，不過我個friendFrancis話佢架車最近加咗部喺JCShop買嘅「道路監察錄影器」（圖）。據講呢部嘢喺日本返嚟，外形同司機位前嘅倒後鏡一樣，但鏡右上方有個可以調校330度角度嘅鏡頭，可以影車前方、車廂、車後嘅情況，一開車攝影機就會啓動，不斷咁影，一張16G嘅SD卡可以影足24小時。倒後鏡可以變螢幕，即時翻睇片段，有乜事可以做證據。
佢話喺日本會強制的士司機安裝呢套監察錄影器，因為當地的士劫案嚴重，鏡頭對住車廂，啲賊唔敢亂嚟。不過由於涉及乘客私隱，香港的士未必可以安裝：「聽講下個月政府就會攞出嚟討論㗎。」不過部嘢賣成2,980蚊都幾貴。
電郵：mailto:[email protected]
逢周日刊出