公民提前認輸？上屆聯賽亞軍公民，昨日在旺角球場憑麥斯及辛祖的入球，以2:1擊敗天水圍飛馬，全取3分後積分榜升至第3位。惟公民行政總監貝可泓仍認為，追上榜首的南華機會渺茫，今後只會專注盃賽。
賽前揚言留力出戰聯賽盃的公民，雖然收起本身有4面黃牌的中堅艾里奧，但同樣再領黃牌便停賽的隊長法圖斯，則在正選名單內。面對踏入09年未嘗一勝的天水圍，公民是踢法較進取的一隊，就算現場1,122名觀眾中，大部份是身穿黃戰衣的天水圍球迷，他們的吶喊聲始終改變不了天水圍陷入苦戰的局面。
岡野雅行「莫氣」被換出
天水圍由岡野雅行與中村祐人合組日本雙箭頭，但兩人面對公民雙中堅法圖斯及馬嘉祺，身形上卻佔不到優勢，加上負責聯繫中前場的伊達因傷缺陣，令這支應屆銀牌冠軍進攻火力大跌。相反，公民發揮擅長的穩守突擊戰術，25分鐘已由新援麥斯突破越位，輕描淡寫下射破李健十指關。
下半場換入黎耀昌及鄭少偉等球員加強攻力的天水圍，終於在53分鐘，靠中村一個帶幸運成份的入球扳平；連同今次「士哥」，此子加盟天水圍4場已取得3個入球。至於36歲的前日本國腳岡野雅行，戰至60分鐘時因體能下降被換出。
升第3位落後南華7分
近3場聯賽僅得2和1負的天水圍，為了希望在公民身上取得09年首場勝仗，扳平後繼續搶攻，此舉反而令防線暴露空位，辛祖在69分鐘把握一次機會，為公民射入奠勝入球。
贏波後升上第3的公民，目前落後榜首的南華7分但多踢兩場，貝可泓承認後上奪得聯賽冠軍的機會渺茫。他說：「一開始都已想着留力，估不到仍可贏波，球員真是踢得不錯。」天水圍輸波後，職球員均感到極度失望，教練列卡度沒有接受訪問便返回更衣室。本報訊
《花絮》
接吻魚羨煞旁人
噚日適逢情人節，旺角球場都有唔少球迷拍住拖捧場，情到濃時做吓接吻魚（圖），或散場後喺球場邊玩自拍，真係羨煞旁人。情人節最多人選擇去迪士尼或海洋公園，不過兩個人消費至少5嚿，睇本地波只喺$120蚊，慳埋啲錢都夠食個燭光晚餐啦。
野人中村獲鄉里捧場
日本人民族意識強，好似一班居港日人得知天水圍最近簽咗岡野雅行同中村祐人後，即時全家大細拉隊到球場捧吓鄉里場（圖）。佢哋仲帶埋橫額，完場後又喺更衣室外等偶像。「野人」同中村見到自己友捧場，簽名合照當然冇托手踭。
場內派餅小食亭嗌慘
天水圍噚日喺球場免費派老婆餅（圖），反應唔錯，賽前、中場休息都排長龍，球迷一路睇波一路食餅，幾咁享受。不過，最慘係球場內嘅小食亭，平時都有唔少球迷幫襯買魚蛋同燒賣，今次遇正球隊派免費餅，營業額即時大跌。
