記者Ｔ以前好似在《蘋果日報》工作嘅，記得佢寫教育新聞，有板有眼，應該甚有前途。不過好多記者做做吓都鍾意轉行，去政府做新聞官啦，去商界做公關或企業傳訊啦，不一而足。好似最近在周刊見到涂謹申議員與女朋友之合照，左丁山望吓張相，不知女朋友是誰，睇吓內文，先至知道係國際級公關公司嘅高層阿蘇。唔係話乜，左丁山睇住阿蘇自中大新聞系畢業，佢個真人相貌，靚過張相好多，唔怪得左丁山睇相片走了眼。阿蘇在報界一段時間，做過左丁山屬下嘅屬下，一早就知道佢係醒目叻女，果然佢做咗冇幾耐，就畀《南華早報》撬走咗，之後就係歷史咯。有一次與涂謹申飲茶，佢話搵埋一位公關女將嚟，就係阿蘇，左丁山居然矇查查，懵然不覺佢兩位已經拍緊拖，要到上星期睇周刊先至知道，真係感光慢到極。
記者Ｔ亦早已轉咗工，一直不知在那方。此日突然收到廉記幾隻宣傳光碟，係由記者Ｔ寄過嚟嘅，先知道佢已經去咗廉政公署新聞組，呢幾隻宣傳碟就係廉記成立以來嘅「經典劇集」。香港電影資料館於二月十四日起至三月八日推出：「許鞍華＋嚴浩的電視影片」，其中選播由廉署製作嘅七套劇集。本版年青讀者如果只係睇得多嚴浩專欄而唔知佢嘅電影，請留意嘞。香港電影資料館位於西灣河，坐地鐵可到，今年適逢廉署成立三十五周年，於影展期內在電影館放置宣傳板。呢七套經典廉記片包括：許鞍華執導嘅《查案記》、《男子漢》、《歸去來兮》、《黑白》、《牛扒費》、《第九條》，及嚴浩導演嘅《兩個故事》。廉署成立初期，為咗大力宣傳反貪污，集合不少一流香港人才拍攝電視影片，有橋王之稱嘅許仕仁，當年亦曾擔任監製。眨眼間事隔多年，一九七八年嘅劇集已成為香港創意經典，想睇吓鄭裕玲三十年前嘅樣貌與香港風景線，呢啲劇集好有參考價值。放映之餘，香港電影資料館會邀請幾名導演與編劇，包括嚴浩、章國明、陳文強及劉成漢在二月二十一日舉行座談會，分享根據真人真事改編創作劇集嘅經驗，座談會係公開嘅，大家可以參加。