牛年政界多喜事，兩個男議員搵到第二春，連葉太都話想追多個仔！呢個葉太唔係掃把頭，而係行會新貴葉維義太太葉梁美蘭（Mira）。葉維義從政後保持低調，Mira則繼續風騷Ball場，前晚佢欣賞香港芭蕾舞團《巴赫．芭蕾》首演，公開話要逼老公造人。
Mira農曆年同老公、13歲囡囡、老爺等去加拿大滑雪，玩得開開心心，可惜整斷晒啲靚靚gel甲。Mira一直「恨」追多個仔，𠵱家老公晉身行會，豈非更冇時間造人？Mira直認肚皮未想收工，「想咗好耐喇，造人唔係表面，要好多情趣先得。」
造人好三級
佢話會趁情人節努力造人，記者追問細節，Mira話：「呢啲好三級。最緊要知道老公心意，今年會送特別大嘅gift，因為佢情人節生日，會畀個bigsurprise佢。」
講開造人，教育局政治助理楊哲安上個月榮升老竇，老婆張燊悅誕下六磅半女兒。噚日楊哲安出席公開活動時稱今年開始過三人世界，好彩BB女唔算難湊，至於會否響應特首生三個，佢話：「有能力當然會，但𠵱家要注重工作先。」