早排就換靚Look過新年，過完年，就到09新Look靚車排住隊登場。睇住09版Camry醒目飆埋身，先發現，原來要越執越靚討你歡心，都唔一定要大整容，Camry今次輕描淡寫來次Facelifted，竟然即時就輪廓突出英氣過人。本來已經好有辦法冧掂年輕才俊嘅佢，睇嚟又多幾分本錢！
記者：黎頌詩
攝影：楊錦文
Model：Winnie
菱角玩個性
披住一身純黑行政Look率先登場嘅，係走中間路線嘅Superior240。佢依然延續Camry第6代嘅血統，Facelifed變出新鮮感，話到尾，落力打扮，點都會多加幾分魅力。新版嘅改動，幾乎都集中喺車嘅外表，例牌車頭係變臉重點。首先，最聚焦嘅鬼面罩部份，豐田標誌嘅下方圓滑線條變得略帶菱角，原本平直嘅橫欄柵亦順勢向前凸出，立體感明顯勝舊版。欄柵兩側嘅粗邊消失，頭冚嘅V形線條隱約向鬼面罩延伸而下，看出設計心思。頭燈係新設計，不過外觀跟前作大致相同，只係內藏嘅燈組稍作改動。另一個焦點應該係頭泵把及霧燈，霧燈被換成兩盞大圓燈，不再似「閃縮一角」。頭泵把嘅造型亦配合轉變，由原本嘅平直變成向兩邊上揚。再拉開距離欣賞一下，就會發現各個細小變化竟然令整體風格都有所改變，雖然硬朗個性依舊，但變臉後嘅Camry，減低了以前一味方正嘅呆板感覺，輪廓更為凸出鮮明。
優惠價加屏幕
再睇真，原來十輻式胎軨同下置嘅側鏡指揮燈都係09版新搞作，今次換Look行動嘅「表面工夫」算係做得唔錯！不過睇到內櫳，就有少少失望噃，無乜新意，一眼睇唔出有較大着墨點。無疑，銀配桃木飾板做主打裝潢，加藍調中控台，一貫嘅高雅加貴氣都相當討好，加上前後排座椅以至腿部空間都極為闊落，有晒老細級風範。嘆，原來仲可以包括埋空氣質素，車內嘅空氣調節系統附設離子空氣清新功能，開唔開冷氣都可以保持空氣清新。新版對車廂嘅空氣質素要求更嚴謹，中控台下方嘅點煙器消失，換上隱蔽嘅充電及iPod接駁位，擺明逼老細戒煙。講享受一樣唔可以忽略實用性，後排兩邊椅背可各自拉低，方便行車途中取物之餘，必要時也可令本來已夠巨型嘅貯物空間進一步提升。仲有，喺推廣期內，你仲可以用$5,500選配原價$9,200嘅7吋輕觸式屏幕音響系統，連六喇叭及泊車鏡頭。咁仲唔係逼你越嘆越升級！
CamrySuperlor240規格
引擎：2,362c.c.
馬力：167ps/6,000rpm
扭力：224Nm/4,000rpm
傳動：5前速自動波
查詢：23054555（皇冠汽車）
售價：$273,800
