電盈近日成為全城喊打對象，前高官馬時亨以前係電盈高層，對於舊老闆搞到天怒人怨，佢表現感慨，噚日接受電台訪問時，呼籲僱主避免裁員，因為企業裁員唔止影響一個人，而係整個家庭。肥馬又話，大企業利潤減少係大圍環境唔好，相信股東會明白，要減輕成本，可以考慮放無薪假期或減薪，如果公司賺錢都裁員，只會令職員有離心。
肥馬又提醒大老闆唔好太無良，因為受尊重嘅商家通常都係有良心僱主，呢啲忠言，唔知小小超聽唔聽得入耳。噚日情人節，肥馬勸勉後生仔唔好將失戀睇得太重，佢聲言自己係失戀王，最終都搵到終身伴侶，結婚31年，相處之道係有認錯胸襟。