隔牆有耳:曾憲梓嘜頭升天 - 李八方

隔牆有耳:曾憲梓嘜頭升天 - 李八方

前人大常委曾憲梓淡出政壇,噚日請記者到佢豪宅午宴暢談政事,主動批評民主派,指呢班人成日鬧人,卻冇建議,得個鬧字冇鬼用。金融海嘯下富豪身家大縮水,曾憲梓話自己「窮到怕」,所以一直唔炒股怕蝕錢,亦禁止仔女炒股票,遑論買accumulator。
避過一劫,曾憲梓繼續唱好香港,話香港係福地,世間難求,只要大家有信心就捱得過難關。75歲嘅曾憲梓有游早水習慣,現時健康良好,舊年好多人批評佢坐輪椅傳聖火,佢話自己係申辦奧運會委員,做火炬手實至名歸,其他人批評一笑置之。
被稱為領呔大王,佢家中最少有兩條傳家之寶,一條係印有毛澤東肖像嘅領呔,另一條有佢自己嘜頭,佢話呢兩條呔都曾與神七上太空,能夠同毛主席一齊升天,相信世間無出其右。