情人節本是愛侶sweetsweet之時，外遊慶祝增添浪漫氣氛人人想，但放不低家中寶貝小狗永遠是出門最大障礙，經常擔心牠食不飽、穿不暖，而且更可能因缺乏照顧令牠情緒低落。幸好現在狗酒店選擇多，能把狗狗送進設備完善、近乎八星級的狗酒店，讓牠們於情人節亦可齊齊Happy一番。單身狗男女仲有機會於酒店搵到另一半，令有情狗終成眷屬呢？
記者：蒙為亮
攝影：陳陶鈞
三百呎VIP房
適逢二月十四日情人節，主人要拍拖，狗仔也要浪漫一番。作為一對狗男女也必須有自己的私人空間，狗酒店實為不二之選，好似今期主角靚仔金毛DotCom就奉主人之命不做電燈膽，立刻相約了相識一年的sexy狗女友DotDot去酒店秘密「偷情」。DotCom和DotDot在主人的悉心安排下，被安排入住八星級狗酒店的VIP房。房間是酒店最重要的部份，而VIP狗房更可算與別不同，豪氣十足，面積還有三百呎之大，狗仔跳Breakdance都綽綽有餘，而且更提供減壓床增加舒適度，避免因驚慌引致脫毛的情況。唔使困於狗籠內，用家DotCom立刻Free晒，還大讚：「啱啱好Fit到我哋兩隻大狗一齊攬住甜蜜蜜。」每間房更設有專業抽風系統，職員亦會每日用噴霧劑消毒房間，所以清潔衞生方面比起一般狗酒店更勝一籌。最窩心當然是其隔音設備，採用分區房間設計以直接減少狗吠的噪音，連狗女DotDot都話：「咁就唔怕嘈親隔籬啦！」
為小狗拍照解相思
DotCom和DotDot經過一整夜的SweetSweet，便一早起床，吃過名牌亁糧早點後，貪靚的DotDot立即找駐場的狗仔美容師扮靚靚，先做一個狗仔Spa再冲個靚凉，大執一番以靚爆鏡姿態同男友仔周圍玩盡酒店其他設施。至於好動的DotCom亦不愁俾女友冷落，約埋一大班狗男組隊踢場狗仔英超。DotCom在比賽中有不俗的演出，帶領「狗路士」輕取對手三比零，全情投入瘋狂比賽的狗戰友為了爭勝差點打起來，幸好酒店有專責保母在場觀戰防止意外發生，必要時立即腰斬球賽，絕對安全十足。專責保母除會照顧狗仔的起居飲食，更每日定時巡房及記錄狗隻狀況。二十四小時貼實狗仔已經令主人放心，職員更貼心地每日為狗仔拍照，以電郵發送給狗主，即使身在外地的主人，就毋須對愛犬牽腸掛肚啦。
收費不貴住好D
狗酒店的員工陳小姐亦有幫襯公司的酒店服務，「其實在外國帶狗狗入住狗酒店已經是很普遍，在香港寵物界也慢慢成為一種新潮流。香港人過時過節都喜歡去旅行，但係如果照顧狗仔的任務交畀親戚朋友，一來麻煩，二來又驚照顧不周，所以放在狗酒店永遠是最方便的選擇。我屋企總共有八隻大狗，每次去旅行或者有朋友到我家開Party，都會放牠們在這裏寄宿。價錢又唔貴，VIP房$185就有得住。」不過要澄清一點，不是每一隻狗仔都可以用$185豪住VIP房，因為房間的價錢是以狗仔的磅數來計算，如一百磅以上的大狗就要$310（包三餐）。如果狗主們想幫自己的Single狗仔「相睇」搵個伴的話，狗酒店亦可以安排進行社交活動，「首先我哋會徵求主人的同意，而另一方面狗仔必須符合安全要求打齊針、無傳染病及已經絕育。因為這樣才可以確保沒有風流狗的出現。」
入住寵物酒店的狗仔的要求：
1.年齡方面最少必須滿5個月。
2.必須持有有效預防針卡正本，證明狗隻已接受完全性的G6混合防疫注射。
3.而且必須接受過瘋狗症預防注射及已植入確認身份的晶片。
4.入住的狗隻必須被投放杜蚤藥品。
PETWORLD
地址：新界元朗錦田水尾村351號
電話：24706928
網頁： http://www.petworldhk.com
