𠵱家Blu-ray機價錢跌得好犀利，二千蚊唔使就有一部。以平價搶灘，市場上最賣得嘅Blu-ray機新力PS3，佢勝在不斷可以upgrade。老細James話，PS3最近推出最新更生程式2.60，免費提供全新嘅photogallery睇相功能。新程式可以將相片分為八大類，除咗可選擇以影相時間嚟播放，最特別係可選擇以笑容、年歲咁睇相，「選咗笑容分類，部機就會選擇有笑容嘅相播放。」
James又話，𠵱家PS3仲加強女仔遊戲市場，好似最近推出嘅LittleBigPlanet過關遊戲好受女性歡迎，今日仲會搞情人節打機比賽㖭。好似其中一對參賽嘅設計師兼機迷Alex同女友阿Ling，呢幾個月猛練LittleBigPlanet。Alex話，前年年底遊戲展睇中咗cosplayer阿Ling，驚為天人，結果冧掂成為拖友。
比賽下午2時舉行
Alex話，以前淨係會玩賽車game，識咗阿Ling就玩多咗女仔遊戲，「同女友一齊玩可以增進感情。」佢又話，𠵱家經濟唔好，今日情人節唔送花唔出街食飯，約埋女友嚟參加比賽，跟住返屋企玩煮飯仔，都一樣開心。
情侶今日可即場參加，下午兩點喺海港城LCX3階嘅草莓甜品餐廳舉行。
逢周六刊出