蘇施黃（阿蘇）開工時嚴禁工作人員傾偈，一見即抦，原來這種嚴謹工作態度源自俞琤。阿蘇直認年輕時在電台工作曾因少不更事懶散終日，被俞琤鬧到狗血淋頭，更想過劈炮唔撈。人前硬淨的阿蘇，其實也有軟弱時，一次上台分享感受，念及父母的她突然失控狂哭，喊足幾分鐘。
蘇施黃去年3月離開商台，外傳她因不續約，而與舊同學兼一手帶她入行的俞琤反目。日前阿蘇接受鄭經翰主持的清談節目訪問，談到反目傳言，她劈頭便說：「你都黐線！我冇俾人炒，商台炒過你啫！冇俞琤就冇今日嘅我。」甚少讚人的阿蘇，更憶述3件陳年往事，大談俞琤的知遇之恩。
逼出自己風格
78年俞琤一手提拔阿蘇入商台，有次阿蘇跟同事吃完午飯，懶懶閒聚在公司玩串字遊戲，俞琤一手掃起拼字板便走了，阿蘇說：「𠵱家諗番，就知道係自己唔啱。嗰陣我每次錄廣告，俞琤永遠都NG我好多次，但永冇講問題出喺邊，我當然人都癲，不過諗番覺得佢咁做，係想畀我撞出自己嘅風格啫！」
阿蘇與俞琤共事期間，阿蘇自言經常「吞泡」，一次終於出事，俞琤致電搵人，她說：「佢問我喺邊度，叫我即刻返公司，因為佢語氣好衰，我道氣下唔到，就兜咗個大圈，又渡海輪又電車先返去，當然俾佢鬧到狗血淋頭，當時我發誓話永遠都唔同佢打工，其實佢又係緊張我工作態度嘅問題。」
誓5年儲2000萬
憶及從事保險業的日子，阿蘇直認是人生低潮，她說：「嗰陣workshop要我哋諗一啲好後悔嘅事同在場人士分享，輪到我走上台，拎住個咪，想講，就喊咗出嚟，好似細路咁喊到收唔到聲，足足幾分鐘，點解？可能當時工作開始走下坡，我就諗，如果父母要離開呢個世界嗰陣，但仍然放唔低我呢個女、仲要擔心我，點解呢？我個心就好難過。」
阿蘇自言過去賺幾多使幾多，數年前一場大病，錢銀有出冇入，令她明白錢的重要，她說：「手術住院埋單要成30幾萬，假如我再病點算？嗰陣係05年，我同自己講要喺5年內儲2,000萬，係儲，唔係搵。」
撰文：林妃
