穿鬆糕鞋熱褲情人節報喜<br>Kelly:我有咗3個月要Keep住型

穿鬆糕鞋熱褲情人節報喜
Kelly:我有咗3個月要Keep住型

樂壇天后陳慧琳(Kelly)選在浪漫滿瀉的情人節報喜,正式宣佈造人成功,現時已懷孕3個月。去年10月結婚的Kelly一直表態恨生BB,不過她昨日出席公開活動公佈大肚喜訊時,仍然百無禁忌穿熱褲露長腿配4吋鬆糕鞋上陣,更揚言會Keep住型,靚到分娩一刻,實行做個潮媽icon。

踏入牛年後娛樂圈又傳喜訊!36歲的樂壇天后陳慧琳去年與拍拖16年的男友劉建浩(Alex)拉埋天窗,講明婚後要老公戒煙趕造人,昨日她在情人節前夕正式宣佈懷孕3個月,預產期是今年8月,如無意外應會在港生育。

百無禁忌
「着住呢對鞋跳舞都得」

Kelly昨日雙喜臨門,她在山頂出席美心餅店活動時,除宣佈續約代言人外,更公佈懷孕喜訊,令今日的情人節更見幸福滿瀉。雖然Kelly的腹部未見隆起,但身形較前豐腴,穿Chlo囗外套及熱褲露長腿的她,還腳踏4吋鬆糕鞋示人,繼續有型行先。活動開始時,司儀表示Kelly賺錢多,可以買一架二人駕駛、一人坐的車(即指BB車),豈料Kelly答道:「係呀!我已經有咗3個月,Alex仲負責揀BB車。」
大會昨送贈價值逾3萬元的蜘蛛肚花膠給Kelly補身,她在台上講述懷孕心情時說:「真係好開心,但又好擔心,驚個BB唔知健唔健康,希望可以順利生到。」貪靚的她更揚言堅持型到分娩一刻,她說:「𠵱家仲可以着高踭鞋,靚啲呀,我仲唔搏命着?Keep住型。」
有餡的Kelly昨日仍表現輕盈,接受傳媒訪問時身體不停搖來搖去,大力踏步落台時更發出「啪」一聲,嚇得身旁人士大為緊張。問她會否留在家養胎,她百無禁忌地說:「如果論盡就唔出街,費事行行吓跣低咪死?自己都擔當唔到。活動自如就話唔擔心,但太辛苦,我驚人哋都擔心啦。」會否減少着高踭鞋?她說:「盡量着到變得論盡為止,我着住呢對鞋跳舞都得,𠵱家有咁靚得咁靚,過幾個月後就唔知啦!」
Kelly謂本希望生龍鳳胎,她說:「但𠵱家最重要BB健康,太細個唔知佢仔定女,冇所謂啦,睇個天畀乜嘢我囉。」Kelly婚後短短4個月已懷孕3個月,換言之婚後一個月已火速有孕,問她有何獨門秘方?她笑說:「冇喎,睇醫生有指示。」是甚麼指示?她只說:「專業人士會教㗎啦。」

步步驚心
誓言要做潮媽的Kelly,昨日仍穿熱褲露長腿,腳踏4吋鬆糕鞋,有型依舊。

家人高興
奶奶贈鮑魚花膠補身

原來Kelly農曆年廿五曾赴滬工作,當時已知懷孕的她仍唱快歌《紙醉金迷》,新年期間則乖乖留港度歲,她說:「其實知道嗰刻好難以置信,屋企人都好開心,仲即刻摸我個肚。屋企人同老爺奶奶買咗鮑魚、花膠、海參、魚翅、燕窩,所有最貴嘅嘢畀我。老公就幫我煮嘢食、拎嘢、洗嘢咁囉。」問她懷孕後口味有否改變?她說:「我冇嘔,都算OK唔辛苦,每日口味就有唔同,有時鍾意食士多啤梨、芒果,鍾意食生果多啲。」她指Alex反而禁忌多多,Kelly說:「有時我做啲伸展動作,趴喺地下佢就唔畀,嚇親佢。」

蓋衣保暖
傍實Kelly的工作人員表現緊張,攙扶她上台兼在她坐下時以衫鋪腿保暖(圖)。

胃口大開
大肚後的Kelly笑言口味經常變,不知有否胃口大開?

繼續工作
「唔太想成日留喺屋企」

Kelly又謂產後未必減少工作,她說:「暫時一切正常,到我最辛苦嘅時候先休息,生完要睇健康狀況,我就唔係太想成日留喺屋企。」她也不抗拒產後拍收身廣告,說:「睇佢點拍,唔好太核突就得。」會否拍大肚寫真?她說:「邊有人睇呀?咁恐怖!如果唔露個肚,有個shape都OK。」Kelly目前仍如常工作,更會為《左麟右李》演唱會擔任嘉賓,Alex目前則在外地公幹。
Kelly經理人鍾珍昨日指Kelly的工作將有變動,她說:「原本3、4月有10幾個外地騷搵佢,𠵱家推咗。原定暑假推出嘅國語大碟就延遲到年尾,或者將來可以錄埋BB把聲。」
採訪:王連連
攝影:陳慧安、仇志德

小心攙扶
傍實Kelly的工作人員表現緊張,攙扶她上台兼在她坐下時以衫鋪腿保暖。

Kelly與丈夫Alex去年10月結婚,婚後4個月已成功造人。

摩登潮媽

Kelly去年10月新婚不久,即馬不停蹄往返內地及台灣掘金,盡顯靚太及事業強人本色。昨日她宣佈有喜,選擇穿上其至愛法國名牌Chlo囗的09春夏新裝作孕婦look,一襲白色套裝,露出長腿配以gladiator式風格的4吋platform鬆糕鞋,顛覆傳統孕婦打扮,身體力行以新世代的獨立潮媽摩登look打扮示人。

相士話:牛B欺負牛爸爸

陳慧琳昨日宣佈懷孕3個月,玄學家麥玲玲昨日在電話中指出屬鼠的Kelly和其屬牛的丈夫Alex,與將出生的屬牛BB均十分夾得來,而且BB可帶旺Kelly生育後的事業,但長大後會欺負爸爸。因BB於下半年出生,五行平均,脾氣不會像上半年出生的小孩子般暴躁,而且性格勤力兼實在。麥玲玲又指Kelly本命有兒亦有女,故今次她懷的可能是龍鳳胎。

娛樂資料庫
女星出嫁火速造人

去年10月結婚的陳慧琳火速造人成功,宣佈懷孕3個月,正所謂有仔趁嫩生,不少女星嫁人後也快速「增產報國」。

張燊悅

徐子淇

張燊悅
07年11月與前任議員楊孝華兒子楊哲安結婚,上月一索得女。

徐子淇
徐子淇於06年12月與恒基兆業二公子李家誠在澳洲舉行世紀豪華婚禮,翌年7月中即誕下女兒李晞彤。

張栢芝
謝霆鋒與張栢芝於06年8月在菲律賓結婚,年底即傳出喜訊,並於翌年8月1日誕下兒子Lucas。

王菲
05年7月與李亞鵬低調成婚,同年11月承認懷孕3個月,並於06年5月誕下女兒李嫣。

李嘉慧
05年中與男友任偉成於美國秘密結婚,翌年3月誕下B女Valerie。

資料來源:《蘋果》資料室