賭王何鴻燊千金何超瓊（Pansy）近日可謂雙重打擊，父親身家被指縮水9成，她也透露身家賬面蒸發不少，心理上不開心。當記者問到其前夫許晉亨與李嘉欣傳出造人成功，她更顯得𤷪𤺧，表示沒有需要問亨亨的事，與她無關。
巴黎魚子醬餐廳名店CaviarKaspia前晚為進駐中環置地廣場，舉行開幕活動，不少名人如賭王何鴻燊千金何超瓊、任達華琦琦夫婦、周麗淇，已分手男女趙式浩及羅苡之也同場出現。近日賭王何鴻燊被《福布斯》指身家縮水9成，在富豪榜急跌，女兒Pansy對此說：「唔使點睇，佢自己都回應咗。」
「點解要問佢」
記者問Pansy的身家有否縮水，她也不禁慨嘆說：「成個市場，連政府都要調整，呢個係賬面數，心理上都唔開心，都有打擊。」當記者問到李嘉欣傳出有喜，有否向前夫許晉亨求證，Pansy即𤷪𤺧地說：「點解要問佢，仲有冇需要問佢先，唔好問我有關佢哋兩個嘅事。」
記者再問她是否已搬出與亨亨居於同一大廈的花園台，她說：「係啦，以後唔再回應，人哋開開心心，兩個人嘅關係問我冇必要，戥人開心嘅事咪自己問番佢，唔好問我。」記者笑問若亨亨榮升父親是否都不會再講，她說：「點解我有任何反應。」
華仔責爆料人
此外，一向識享受生活的任達華表示曾嚐過價值78萬元的魚子醬餐，他表示若今屆贏出金像獎男主角，揚言會請傳媒吃魚子醬大餐慶功。
談到近日藝人鹹豬手事件，會否令他與女藝人合作時多加避忌，他說：「我冇避忌，啲人炒作，講出嚟都唔負責任，一係講出嚟係邊個，唔好令人揣測，唔好日日食鹹豬手。」
採訪：LawWaiMan
攝影：EdwardChou
