牛：好嘢喎畢傑！推介巴西上盤。
畢：我呢啲巴西死硬派「粉絲」，梗撐愛隊場，事實亦畀我批中意大利球員冇乜態。
牛：我就自己攞嚟賤啦！唔信你，走去買下盤加「大」！
畢：乜咁睇唔開呀，牛兄！
牛：唉！諗住東尼呢排喺拜仁咁勁，點知就係衰喺呢個敗家仔手上，門前幾碼都唔入，中番個「大」唔使輸之餘，仲有微利吖！
畢：你呢鋪真係「蘿呢毯」！係喎，上期同你對賭倫敦打吡，我揀咗熱刺下盤，快啲賠！
牛：唓！我同你賭杯奶茶咋嘛，家陣阿仙奴輸半個盤，我咪嘔番半杯出嚟畀你飲囉！再私人醒啲頭髮你嘆吓㖭呀！
畢：頭髮奶茶？
牛：95247！同我飲晒佢！哈！
畢：唉，你條友都冇口齒嘅，下次唔鬼同你賭！算喇，今個禮拜有咩好嘢畀讀者？
牛：最近牛癮發作，我都癲癲哋，諗住再追荷甲嘅阿積士。佢哋連續4場聯賽未贏過，我之前就追足4口，輸到一仆一碌，死都唔信今次對住飛燕諾又贏唔到！
畢：賭波嘅嘢就係咁邪，我冇蘋果波神同吾中咁熟荷甲，畀唔到意見你，你最好落注前問一問佢哋先。你知你㗎啦，呢排咁黑。
牛：我牽牛咩都識啲嘅，我有分數啦！你又有咩心水呀？
畢：就今晚場德甲啦，我買利華古遜輸唔到畀賀芬咸，受讓抵到爛。