政制及內地事務局局長林D9被爆益自己友，違規用一名普通政府汽車司機幫佢揸局長座駕，林D9噚日同傳媒飯局，席間解釋從冇過問司機安排，又指一直幫佢揸車位司機，由於涉及一宗交通違例事件，不能升職，所以近日被調走，佢並非被人踢爆先更換司機。
諸多解釋，總之佢冇玩特權啦。其實高官可以揀靚冧巴AM車牌、有專用貴賓車司機，已經係特權。政府司機係公務員，卻要特別安排服侍個別高官、局長，學足私人公司老闆排場，係咪合理呢？呢啲殖民政府殘留陋習，應該檢討廢除，八方促請審計署長開「快勞」做個衡工量值報告，睇吓浪費咗幾多公帑。林D9噚日送咗嚿水晶膠相架畀記者做新年兼情人節禮物，有行家笑言應該派番嚿膠畀佢。