法院早前判沙田區議會大圍選區07年選舉結果無效，要舉行補選，補選提名期今日開始，2月26號結束。當年當選嘅袁貴才同落選嘅民主黨梁永雄會再決一勝負，自由黨李躍輝都想加入戰團。
八方聽聞自由黨對是否派人出戰舉棋不定，因為該黨要行直選路線，派人參選理所當然，然而考慮到勝算，就要盤算會否因小失大。小道消息稱中聯辦都唔祝福自由黨，有人同黨內人士分析，參選者應該有一定地區工作政績，空降參選唔係幾好，暗示自由黨無謂攪局。李躍輝07年喺禾輋區落選，念念不忘再戰江湖，據稱參選意欲甚高，是否入閘端視自由黨取態。佢最近喺大圍開咗間新診所。