金融海嘯令好多市場秩序推倒重來，政府同銀行間關係亦變得撲朔迷離。好似《Euromoney》噚日喺香港，搞咗個環球基建融資研討會，按照原本程序，協辦單位之一嘅獅子行滙豐，佢哋亞太區「二哥」、行政總裁霍嘉治，本來係第二位主講嘉賓，點知大會臨時改變排位，由原本第三位發言嘅房屋及運輸局局長鄭汝樺，打咗霍嘉治尖，率先開腔。
臨時改排位
英式幽默係滙豐大班擅長嘅「國技」，對於臨陣調動，霍嘉治好輕鬆咁話，於此紛亂時勢，你唔一定知道，幾時講嘢同埋向邊個講。佢仲意猶未盡，可圈可點咁話，政府喺市場扮演嘅角色非常重要，所以政府官員先過賓架發言，係正確嘅做法，講完即時惹嚟在座嘉賓報以熱烈掌聲。
籲踏實迎挑戰
咁又啱嘅，歐美銀行國有化之後，市場無形之手已一去不復返，政府變身做大老闆，為咗刺激內需，政府基建工程紛紛上馬，連九唔搭八嘅擔擔抬抬，好似換盞光管、起個狗公園咁，通通都多咗個救市光環。
之不過，淨係抱怨唔係辦法，霍「二班」寄語金融同業，唔好再嘥時間緬懷過去風光日子，或者玩卸膊推莊，亦唔好凡事都諗得太過陰謀，只要踏實迎接挑戰，捱過去就會隱約窺見更好嘅明天。
李華華
mailto:[email protected]