寫呢篇稿預咗俾敏妮啲friend話冇義氣，但唔開名嘅話，希望大家唔好見怪。前嗰排某位朋友訂咗批紅酒返香港，仲搵咗幾個friend出嚟試酒，敏妮有幸成為座上客，兼席間唯一嘅女士。飲多兩杯，朋友開始講近期新買嘅「玩具」。
瞞老婆買「玩具」
男人嘅玩具，離唔開高科技電子產品，令敏妮有興趣係佢哋買嘢嘅「鬼祟」。其他人唔講，就以席間一個做banker嘅friend為例，出入商場同人傾刁，運籌帷幄，但買件玩具，就要絞盡腦汁，諗計瞞老婆。最簡單莫如話件玩具係cheap嘢，又或者明明係新，都話係二手。
聽到佢哋嘅對話，敏妮記起睇過一篇講老婆當家、老公理財嘅文章，作者話屋企嘅大小家務、食飯着衫、往來應酬，都由太太負責，但一切費用開支就由佢做財政大臣。喺經濟不景氣時，做財政大臣唔係咁易，睇吓美國財長蓋特納俾人問到唔識點反應就知。
不過，呢位作者就話喺經濟差時，及時推出家庭理財措施，包括每月收到薪水後，就同太太預算全家一個月所有開支，然後將餘款存入銀行；另外就係用錢時採取「先預支，後報賬」嘅辦法，大額付款要先得雙方同意。
就係咁，屋企嘅財政年年都有盈餘，佢老婆亦好放心畀佢掌管財政。呢位作者好得戚咁話，對於嗰啲將全份糧交晒畀老婆，自己每月要挖空心思收埋啲私房錢嘅人嚟講，佢自覺好逍遙。
家庭財務攤開傾
敏妮雖然一再強調，夫婦間要財政獨立，但做到互相尊重、互相信任，亦畀到對方信心，家庭嘅財務問題相信會大減。
溫敏妮
http://wanmanli.com/blogs/