金融海嘯下，都係有個錢傍身好啲。民建聯今屆立法會會期開始，同富貴黨自由黨睇齊，取消立法會議員要上繳部份薪金畀中央嘅政策，換言之議員可以收足份糧，唔使進貢黨中央，荷包都豐滿啲。
唔使議員上繳薪金
副主席葉國謙話其實從政表面風光，議員開支好大，既然個黨唔係等錢使，無謂將議員搾亁搾淨。佢話民建聯最多曾要求議員上繳四分之一薪金，以月薪約六萬元計，即係要畀萬五蚊；德政下最幸運嘅係陳克勤同李慧琼兩位新丁，因為甫做議員就可以將全份薪酬袋袋平安。
民主黨冇咁闊佬，規定非全職立法會議員要上繳三成薪酬，全職嘅就上繳一成，新丁甘乃威要「超李趕楊」，連開六個地區辦事處，較楊森、李柱銘兩個議員合共五個辦事處仲多，要拎埋部份薪金出嚟做地區工作，直情貼錢做議員。不過甘威唔使太愁，事關身為區議會代表嘅葉國謙話，會喺任內做啲嘢，爭取區議員薪金倍增至三萬蚊，希望吸引年輕專業人士參政，甘威身兼區議員，成事都得益。