農曆新年後，裁員潮一波接一波，高薪厚職嘅渣打銀行亞洲區總經濟師關家明亦自嘲，經濟師喺金融界係最高危行業。
唔賺錢先叮走
何解咁講？佢噚日喺記者會話，由於經濟師唔會為公司賺錢，所以金融機構一旦裁員，首先被叮走嘅，多數都係經濟師；等經濟好番，最遲填補嘅人手亦係經濟師，可謂「遲嚟先走」。不過面對經濟周期起落，佢認為裁員嘅做法無可厚非，反而最近內地推出新措施嚴控企業裁員，做法唔多應該，因為唔能夠承受經濟周期下滑嘅企業，多數係效益欠佳，趁經濟低潮應該汰弱留強。
另外，該行對香港今年經濟前景再次看淡，由原來估計負增長0.9%，修訂為負1.8%，原因係歐美國家近期表現較預期差，佢希望內地加大內需，能夠令香港嘅經濟喺今年中得以穩住。