前晚啲友賽有唔少爆冷賽果，講到最爆同最累街坊嘅，肯定係德國主場輸挪威0:1呢場。呢場波德國強陣，但挪威就冇咗7件正選，兼且喺08年未贏過，佢哋贏唔到之餘仲輸埋，又係路維帶隊以來首次連敗，真係夠歷「屎」性喇！
德國上場友賽喺柏林輸俾英格蘭1:2，就賴冇咗波歷克同芬寧斯，但前晚佢哋兩個都歸位，配合舒韋恩史迪加，同埋今屆喺德甲打得幾好嘅杜查奧斯基，可以話係德國最強嘅中場線；加埋前線有喺上場德甲入兩粒嘅高路斯，對冇咗7個正選兼喺08年冇贏過嘅挪威，點可能唔贏呀？
自1936年首負挪威
成場波德國控球時間多，但對手挪威擺明死守，唔俾空間佢哋組織；而且佢哋踢得又慢又靜又冇創意，做唔到任何似樣啲嘅攻勢。足球就係咁，你射極唔入對手就入你，佢哋入唔到波，結果只得一個，咪係輸囉；佢哋喺63分鐘被效力海倫芬嘅挪威中場堅迪希姆一腳搞掂輸0:1，爆個7.5倍冷W，而且仲係自1936年以來首次輸俾該北歐球隊。
路維喺06年世盃決賽周後，接替奇連士文做德國教練，帶隊打咗35場，攞到24勝5和6負，當中仲未試過連輸兩場，成績相當唔錯，但前晚輸完後連輸兩場友賽，破晒數據之餘，仲要係跨年咁輸，咪話唔樣衰。喺友賽輸波其實好平常，德國前年都試過俾丹麥搞掂，爆個3.45倍客W出嚟，但弊在呢場波佢哋強陣輸波，對手仲要係一支成年冇贏過嘅球隊，無疑係個警號。
路維係時候要change
德國中場兩大主力波歷克同芬寧斯今屆狀態麻麻，年紀亦唔細，同係32歲，所以路維係時候諗諗，唔可以乜都靠晒佢兩個；仲有就係路維師承奇連士文打進攻足球，仲繼續用對方嘅鑽石中場，不過一成不變唔係路，要令對手估唔到先有得贏。嚟緊喺3月尾4月頭嘅兩場世盃外圍賽，佢哋會對列支敦士登同威爾斯，希望到時由屎波變好波，唔再令支持者失望啦！