將於今年4月退休嘅陳日君樞機，向來鬧人唔畀面，高官、特首都俾佢直斥其非，有啲人覺得佢火爆又出位，樞機接受最新一期《公教報》訪問時卻話，只係依照原則而說話，唔會後悔，但佢話如果有人指佢鬧錯人，話佢知佢錯咗啲乜，佢樂於認錯。
早前樞機發表聲明講《家暴條例》，怒斥民主黨「大蝦細」，唔畀身為基督徒嘅黃成智豁免跟隨黨嘅決定投票，佢話經一番了解之後，覺得當時對政黨嘅批評可能係衝動咗啲。樞機今年77歲，好多長者好固執，佢卻肯公開講番呢件事，承認衰一時衝動，同嗰啲唔見棺材唔流眼淚、唔受譴責都唔見人嘅高官比較，光明磊落好多。
政治環境令人無奈
樞機嘅格言係「洶湧波濤莫驚怕，平安抵岸全靠祂」，回顧過去幾年大事，佢覺得前神父性侵犯兒童嘅官司係「洶湧的波濤」，為佢帶嚟好大煩惱，對教會亦造成好大影響。呢兩年樞機少咗批評政府，佢話因為冇乜好講，政治環境又令人好無奈，情願少啲出聲。樞機同香港人一樣，想盡快雙普選，可惜至今桔都冇一個，係人都心淡。