民建聯新星陳克勤舊年一「乳」成名，做議員後卻相當低調，禮讓其他新丁李慧琼、甘乃威爭取曝光，當然佢不甘做「政治植物人」，本月初應西敏寺民主基金會（WestminsterFoundationforDemocracy,WFD）邀請，同民主黨、公民黨代表一齊去倫敦同當地官員、政界人士會面。陳克勤今趟代表香港外訪，政治份量可見一斑。
外訪後多留一星期
此行訪問上周五結束，團員陳淑莊、梁家傑、陳樹英等陸續返港，惟獨不見了陳克勤。據講佢向立法會秘書處請假至本周六，應該係逗留英國多一個星期。有人同八方講，呢次訪英，來回機票由WFD負責，議員應邀外訪要申報利益，如果陳克勤唔係因公，只係因利乘便staybehind，似乎唔係幾妥當。
八方聯絡唔到陳克勤，唔知佢staybehind係公定私。好多人公幹後都會留低玩多幾日，議員都係人，至於條數應該點計，唔到八方指指點點，WFD咁好客，應該好歡迎克勤仔留多幾日喺英國㖭。
其實陳克勤大人大姐，外遊幾天唔使大驚小怪，今次引起關注，其中一個原因，係因為政府要為今日表決撥款90億元注資強積金數票，由於票數緊張，分分鐘一票都不能少，如果陳克勤為私事而唔返香港投票，保皇黨隨時要孭鑊。
交流期間表現沉默
另一個令人牽掛陳克勤原因，係怕佢人地生疏，lostintranslation迷失英倫不知返。有訪問團成員透露，一行人同當地政界人士會面時，陳克勤全程表現沉默，成團人一齊出入尚且有個照應，剩低佢一個，萬一言語不通，你說怎麼辦？
八方則認為唔使過慮，陳克勤近月惡補英文，學教育局官員話齋，去到英國，身處英語語境，正係學習英語良機，陳克勤可能正喺倫敦爭取練習機會，又或者試吓自己係咪學有所成，享受暢所欲言滋味，樂而忘返啫。
WFD經費由英國外交及聯邦事務部資助，負責協助肯雅、莫桑比克、塞拉里昂、剛果、埃塞俄比亞等國家爭取民主。原來喺英國人眼中，香港由前殖民地變咗第三世界地區。
mailto:[email protected]