人總係以貌取人，睇車亦一樣。第一眼見Fiat500，必然反應係：好可愛！背後嘅潛台詞理所當然係：聽教聽話。想當然就坐上司機位，踩油開車。小可愛先嚟一嘢「跪拜」招呼我，再嚟斜路開車竟然變N波溜後……全程玩對抗，我就係咁喺毫無心理準備下被玩殘！然後想起聽過唔少人對這部小車嘅評價：「好好玩」。點好玩法，一於再研究吓。
記者：黎頌詩
攝影：陳陶鈞
Model：Vanessa
手波本色
既然要玩，就梗係奉陪啦，就嚟次三日長測，打醒精神同佢慢慢玩。再收吓料，原來Dualogic係個傾向Manual嘅波箱，所以即使用自動模式行駛，用揸手波嘅方式對付佢，呢部車仔會更加乖巧聽話。先前起步一下踩油諗住衝前，竟然慢過旁邊嘅的士！據講係因為離合器未嚟得切反應，經點醒後，用遞進嘅力度畀油，果然暢順好多。如果用一般模式行車，大概3,000轉先會轉3波，校啱時間鬆鬆油，佢就無咁多機會「跪拜」啦。揸順咗，Dualogic嘅優點開始顯現，最明顯嘅，係對駕駛者嘅動作有快速而明顯嘅回應，Kickdown反應靚絕，過癮！開始玩得開心，係時候要升級，按下Sport掣，成部車即時變得好輕快，感覺充滿活力。睇住儀錶板，5,500轉竟然仲Keep住3波上斜，指針直指110公里，辣味爆發，先發現，車都唔可以「貌相」㗎！畀到你手波樂趣嘅自動波車，應該係Fiat500操控上嘅一大賣點。當然，唔可以浪費佢嘅手波本色，究竟表現如何，我請來身旁本身係手波車狂迷嘅攝影師哥哥去評價。
突然有童心
佢好認真，波棍被上上落落係咁推，然後得出結論：「似乎只係可以逐個波檔換，不過反應比我部棍波車仲要快，算係好好玩……」因為真係好好玩，我哋上山落斜大大話話掟足幾十個彎，發現：500比起其他小車重心高，不宜放盡高速掟彎。正因為佢重心較高，優點係視野同乘座感都比一般Cute車仔來得舒適。自己本身相當抗拒細車嘅侷促感，但坐喺500嘅車廂內，呢種感覺並唔強烈。望住以白色為主調嘅內櫳，加上一車圓碌碌嘅線條，你會覺得自己突然充滿童心，大概，這亦能為駕駛樂趣加Fun。當然，別過份期望一部雙門揭背小車有極寬敞嘅空間，500嘅內櫳空間算係合理，稍為令人意外嘅係尾廂頗闊落。至於外形有幾可愛，都唔使多講，有樣你睇，值得一提係今次測試嘅係頂級Lounge版，外觀細節位較精緻，內櫳設備亦較高級，08現貨做優惠價，吸引力又多啲啦！
Fiat500Lounge規格
引擎：1,368c.c.直4DOHC
馬力：100bhp/6,000rpm
扭力：131Nm/4,250rpm
傳動：5前速Dualogic半自動波
查詢：AutoSportiva（23051155）
售價：$199,800（08現貨優惠）
